Выразны парадак, паводле якога беларусы могуць атрымаць сямейны капітал, абазначыў Савет міністраў. Такая падтрымка шматдзетных бацькоў у нашай краіне з'явілася з 1 студзеня гэтага года. Такім чынам, дзесяць тысяч долараў на безнаяўнай аснове зараз могуць атрымаць сем'і, якія з гэтага года выхоўваюць больш чым двое дзяцей. Грошы можна выкарыстаць на паляпшэнне жыллёвых умоў, адукацыю, медпаслугі, а таксама фарміраванне назапашвальнай пенсіі маці.
Куды звяртацца і з якімі дакументамі, разбіралася Паліна Іванча. Рост - 53 сантыметры, вага - 3500. Некалькі дзён назад Таццяна Кудлянкова трэці раз стала маці.
З нараджэннем Ігната сям'я аўтаматычна атрымала статус шматдзетнай. І зараз гэтак жа, як і ўсе беларускія сем'і, у якіх сёлета з'явілася трэцяе, чацвёртае або нават пятае дзіця, можа прэтэндаваць на сямейны капітал.
Для гэтага ў першую чаргу, трэба напісаць заяву ў мясцовым выканкаме. У дадатак - пакет дакументаў: у ім, зразумела, пашпарт, пасведчанні аб нараджэнні дзяцей або копія ўсынаўлення, пасведчанне аб шлюбе. Калі ж сям'я няпоўная, то неабходна таксама падаць дакумент аб скасаванні шлюбу або пасведчанне аб смерці мужа і пагадненне аб дзецях.
Вольга Сцяпанава, начальнік упраўленняя сацыяльнай абароны Адміністрацыі Маскоўскага раёна Мінгарвыканкама: "На працягу пяці працоўных дзён з моманту прыняцця дакументаў мясцовы выканаўча-распарадчы орган абавязаны запрасіць даведку з месца жыхарства і дакументы ў дачыненні дзяцей. І пасля разгляду і прыняцця рашэння аб прызначэнні альбо аб адмове заяўнік на працягу пяці працоўных дзён апавяшчаецца аб прынятым адміністрацыяй рашэнні".
Толькі ў Маскоўскім раёне сталіцы кожны месяц на 35 шматдзетных сем'яў становіцца больш. Усяго ж тут зарэгістравана каля 2 тысяч бацькоў, якія выхоўваюць больш чым двое дзяцей. Тым не менш, прэтэндаваць на сямейны капітал могуць толькі тыя сем'і, у якіх трэцяе і наступнае дзіця з'явілася з 1 студзеня гэтага года.
Нагадаем, адразу сямейны капітал на рукі атрымаць не атрымаецца. Усе 18 гадоў грошы захоўваюцца на банкаўскім рахунку і на іх налічаюць працэнты. Каб адкрыць адпаведны дэпазітны рахунак, трэба на працягу паўгода звярнуцца ў падраздзяленне Беларусбанка. З сабою - абавязкова пашпарт і рашэнне выканкама аб прызначэнні сямейнага капіталу.
Грошы будуць пералічаныя ў доларах. Каб іх выкарыстаць, прыйдзецца зноў ісці ў выканкам з заявай. Магчымасць распараджацца сямейным капіталам можна даць аднаму з членаў сям'і. Для гэтага трэба аформіць згоду кожнага і пацвердзіць яе натарыяльна.
Марына Арцеменка, намеснік начальніка аддзела народанасельніцтва, гендэрнай і сямейнай палітыкі Міністэрства працы і сацыяльнай абароны Беларусі: "Калі такой згоды ў сям'і няма, сямейны капітал падзяляецца паміж усімі членамі сям'і, якія ўваходзяць у яе склад на момант распараджэння сямейным капіталам, у роўных долях. Калі ўзнікае такая сітуацыя, што ў сям'і няма неабходнасці накіроўваць ні на мэты адукацыі, ні на ахову здароўя, ні на будаўніцтва, то ў такім разе можна накіраваць гэтыя сродкі на фарміраванне дадатковай пенсіі маці".
На тое, каб выдаткаваць сямейны капітал па частках або ў поўным аб'ёме даецца пяць гадоў. Пасля, зразумела, паўналецця трэцяга дзіцяці. Датэрмінова скарыстацца грашыма можна ў адзіным выпадку: калі ёсць заключэнне ўрачэбна-кансультацыйнай камісіі, што аднаму з членаў сям'і патрэбна аказанне экстраннай платнай медыцынскай дапамогі.
