Як стала вядома, Міністэрства адукацыі Беларусі праверыць карэктнасць апрацоўкі вынікаў першага цэнтралізаванага экзамена. Для гэтага сфарміравана міжведамасная камісія, заявіў журналістам міністр адукацыі Андрэй Іванец. У рабочую групу ўваходзяць матэматыкі, інфарматыкі і спецыялісты ў галіне статыстычнай апрацоўкі вынікаў, а таксама навукоўцы. За кароткі тэрмін яны прагледзяць разлікі, якія зрабіў Рэспубліканскі інстытут кантролю ведаў, і ў выпадку выяўлення памылак будуць прынятыя ўсе меры. Размова ідзе пра ЦЭ па рускай і беларускай мовах.
Тыя, у каго ёсць пытанні, могуць прыйсці на асабісты прыём да спецыялістаў. Штодня з 9:00 да 17:00 працуе таксама гарачая лінія РІКВ.
