Надвор'е, хуткасць і дарожныя ўмовы - магчымыя прычыны смяротнай аварыі ў Вілейскім раёне. Там, сёння раніцай перакуліўся "рэно" - жанчына-вадзіцель загінула. Папярэдне, як адзначылі ў ДАІ, аўтамабіль занесла на дарозе, магчыма, шафёр выбрала няправільную хуткасць. У выніку машына перакулілася. Яе муж і двое сыноў не пацярпелі. Вядома, што на адным пярэднім коле была ўстаноўлена летняя шына. Зараз на месцы здарэння працуюць дарожная міліцыя, следчыя і эксперты.
У той жа час ДАІ просіць аўтамабілістаў улічваць, што ва ўмовах надвор’я, якія склаліся, праезная частка, нават калі здаецца чыстай, можа быць слізкай. Вадзіцелям варта выбіраць стрыманы стыль кіравання і бяспечную хуткасць і не забываць аб сезоннай змене шын. Пры нізкіх тэмпературах летняя гума дубее і перастае выконваць свае функцыі.
