"Чырвоная ружа" анлайн у падарунак да юбілею маэстра
У 80-ы дзень нараджэння Уладзіміра Мулявіна яго хіты гучаць ужывую на прасторах глабальнай Сеткі. Беларускі дзяржаўны ансамбль "Песняры" працягвае справу народнага артыста СССР і Беларусі ўжо ў новых формах. 18 гадоў выходзяць да публікі без маэстра.
Да юбілею маэстра рыхтуюць альбом. Прэм'ера ўжо ў наступным месяцы
Гэта 12 новых кампазіцый сучасных аўтараў, але кожная з іх напісана ў фірменнай мулявінскай музычнай стылістыцы. Натхняюцца спадчынай - на сваёй музычнай базе арганізавалі выставу фота і вінілавых пласцінак розных эпох калектыву.
Сталічная студыя "Песняроў" праектавалася і будавалася пры ўдзеле Мулявіна. Праўда, музыкант так і не паспеў тут папрацаваць. У памяць пра Уладзіміра Георгіевіча захоўваюць вось гэты сінтэзатар, які гучаў на канцэртах з яго ўдзелам. Па тых часах самая сапраўдная экзотыка. На такім іграла група Pink Floyd.
Ён пазнаёміў увесь свет з беларускай культурай, пры гэтым беларусам быў толькі ў душы. Уладзімір Мулявін нарадзіўся ў Свярдлоўску, цяперашнім Екацерынбургу. У Мінск трапіў па запрашэнні - прапанавалі пазіцыю ў Белдзяржфілармоніі. І тут ён не адчуваў сябе чужым. Наадварот захапіўся мясцовым каларытам. Узяўся за вывучэнне беларускай мовы, каб працаваць з народнай песняй. Пасля заснаваў ансамбль "Песняры". ВІА вылучаўся тым, што выконваў беларускія народныя песні ў сучаснай інтэрпрэтацыі.
Яшчэ ні аднаму беларускаму калектыву не ўдалося перасягнуць іх поспех
Калектыў пад кіраўніцтвам Мулявіна біў рэкорды па тыражах пласцінак у СССР. Яны сталі першым савецкім ВІА, які правёў гастролі ў ЗША. Прыхільнікі ансамбля нават палічылі - ім апладзіравалі ў 56 краінах. "Касіў Ясь канюшыну", "Волагда", "Калядачкі", "Белавежская пушча", "Александрына" - гэта ўжо залаты музычны фонд, песні па-за часам і эпохай.
У біяграфіі генія было месца не толькі авацыям захопленай публікі і высокім узнагародам
За межамі сцэны - сардэчныя драмы, творчыя спрэчкі і рознагалоссі ў калектыве. А затым аварыя, якая забрала жыццё музыканта, і, задавалася, магла паставіць кропку на дзейнасці калектыву. Але нягледзячы на ўсе выпрабаванні, прадстаўнікі розных пакаленняў ансамбля, родныя, блізкія кожны год сустракаюцца ў гэты дзень, каб аддаць даніну памяці кампазітару. Сёння месца сустрэчы бульвар імя маэстра. Неслі кветкі да помніка пад знакамітую "Малітву". Пранікнёнае выкананне Мулявіна дагэтуль у сэрцах публікі, якая назвала песню духоўным гімнам Беларусі.