Пра баявы дух, імкненне да перамогі і барацьбу характараў - у рэпартажы Дар'і Белавусавай-Пятроўскай. "Танкавы біятлон" традыцыйна закрывае Армейскія гульні. Як бы дае балельшчыкам яшчэ адзін шанц эмацыянальна падтрымаць дух сваіх каманд. Таму сёння на трыбунах палігона Алабіна горача. Расія спявае, Кітай чытае слоган, а беларусы гучней за ўсіх крычаць.
Беларускія танкісты ў тройцы пераможцаў "Танкавага біятлона"
З 16 краін у фінал "Танкавага біятлона" прайшлі толькі 4 самыя моцныя: гэта Расія, Беларусь, Кітай і Азербайджан. Летась нашы танкісты заваявалі серабро, таму зараз мараць не толькі застацца ў тройцы лідараў, але і палепшыць вынік. "Эстафета" - адзін з самых складаных і маляўнічых конкурсаў "Танкавага біятлона". Ад краіны ўдзельнічаюць тры экіпажы. Кожны павінен прайсці 4 кругі па 5 км і паразіць розныя мішэні. І ўсё гэта на максімальнай хуткасці.
Увогуле камандам трэба пераадолець дыстанцыю 50 кіламетраў, паразіць 24 мішэні і прайсці 27 перашкод. Гэта каляінавы мост, супрацьтанкавы роў, міннае поле, 7-метровы касагор і агнявую паласу. Беларусы, якім па жараб'ёўцы зноў выпаў сіні танк і чацвёртая дарожка, стартавалі моцна, крыху саступіўшы ў хуткасці расіянам. Фінал атрымаўся вельмі эмацыянальным і няпростым. Усе тры беларускія экіпажы прайшлі дыстанцыю практычна без промахаў і штрафных ачкоў, але па хуткасці саступілі Расіі і Кітаю. І сёлета заваявалі бронзу.
У Армейскіх гульнях - 2020 каманда Беларусі заваявала 20 медалёў
У Армейскіх гульнях - 2020 беларусы прынялі ўдзел у 22 з 30 конкурсаў і заваявалі 20 медалёў: 4 залатыя, 10 сярэбраных і 6 бронзавых. Так першае месца ў нашых снайпераў, спецназа, інжынераў і сувязістаў. На другім - кінолагі, повары, дэсантнікі, артылерысты, вадзіцелі ваенных экіпажаў, спецыялісты хімічнай і біялагічнай разведкі, майстры беспілотнага бою. Трэцяе месца - у танкістаў, падраздзяленняў СПА, медыкаў, дарожнай інспекцыі і вайскоўцаў, якія паказалі майстэрства не толькі ў стральбе, але і ў творчасці.
