Пятніцу ў мажорным настроі сустракае Маладзёжны тэатр. У афішы - камедыя "Багатыя нявесты". У рэпетыцыйным рытме жыве Вялікі тэатр. На акадэмічных падмостках з'явіцца "Канёк-Гарбунок" на музыку Шчадрына. Не сыходзяць на самаізаляцыю выставачныя пляцоўкі. Якія яшчэ культурныя лакацыі варта заўважыць эстэтам? Маршрутам у рубрыцы "Праменад" падзеліцца Дар'я Тарасава.
Адказ мастакоў глабальным выклікам. Самаізаляцыю на мову тэкстылю пераклаў міжнародны праект "Злучаныя разам". Экспазіцыю міксмедыя, якая аднаўляе храналогію распаўсюджвання каранаінфекцыі ў свеце, прымае Нацыянальны цэнтр сучасных мастацтваў.
Свае асабістыя гісторыі захавання сацыяльнага дыстанцыявання ў выставачную прастору перанеслі тры сотні аўтараў. Арт-геаграфія - 27 краін. Асноўны блок - мастакі з Амерыкі і ўсходніх краін. "Злучаныя разам" - частка буйнога праекта Ongoing Conversation ад іранскага аўтара Судэ Дадраса. Майстар працуе ў шматслойнай тэхніцы шынэлі.
Каранасюжэты аўтары фіксавалі не толькі ў тэкстылі. У экспазіцыі - інсталяцыі і відэаарт. Выставу "Злучаныя разам" ужо ацанілі ў Амерыцы і Турцыі. Наступны пункт на карце праекта - Японія.
Якой будзе куратарская канцэпцыя беларускага павільёна на Венецыянскай біенале? Спойлер чакаем таксама ад НЦСМ. Сёння сумесна з Міністэрствам культуры завяршылі прыём заявак на 59-ы форум. Да 18 кастрычніка журы разгледзіць працы кандыдатаў і абярэ амбасадора беларускага мастацтва. Сюжэтнасць дыктуе слоган "Малаком сноў", выкліканы кнігай Леаноры Карынгтан.
Гранд-тур у калыску Адраджэння ад італьянскіх майстроў. Ці ўжываюцца рэалізм і драматызм барока на адным палатне - падкажуць ў Нацыянальным мастацкім. На дэсерт падаюць жывапіс стылістычных паслядоўнікаў рэфарматара Караваджа.
Ёсць дзівосны край - лейтматыў назвы праекта дыктуюць радкі Венедыктава. Шэдэўры майстроў Рэнесансу 16-га, 17-га і 18-га стагоддзяў і іх вучняў беражліва адрэстаўравалі і дасталі з запаснікаў, каб папулярызаваць уласную калекцыю. Праваднікі ў падарожжа па часе - пінакатэка, гравюрныя кабінеты і мастацтва ў аб'ёме - галерэя бюстаў. Знойдзем і адсылкі да Мікеланджэла і Рафаэля. Злепкі родам з майстэрні Луўра.
Рабочы ўікэнд анансуе "Арт-Мінск". Галоўная сцэна фэсту - Палац мастацтваў на Казлова. Дарэчы, начынка экспазіцыі даступная да набыцця анлайн. На выбар эстэтаў і класіка на палатне, і мастацтва ў лічбе. Такім быў арт-дайджаст гэтага тыдня. Сачыце за навінамі ў рубрыцы "Праменад" кожную пятніцу і выбірайце свой культурны маршрут.
