Ужо 20 гадоў яны дораць Надзею. Аднайменны дзіцячы рэабілітацыйны цэнтр, які размясціўся на беразе Вілейскага вадасховішча, напярэдадні адзначыў свой дзень нараджэння… Тут ужо два дзесяцігоддзі беларускія і замежныя спецыялісты дапамагаюць дзецям, якія жывуць на тэрыторыях, пацярпелых ад аварыі на ЧАЭС. Усяго каля 65 тысяч маленькіх пацыентаў.
Рэпартаж Аляксея Родзівонава. Некалькі сотняў паветраных шароў напярэдадні ў неба адпусцілі тыя, хто на працягу цэлых дваццаці гадоў не проста дапамагае беларускім дзецям, якія жывуць на тэрыторыях, што пацярпелі ад чарнобыльскай катастрофы, але і ў прамым сэнсе слова дораць ім Надзею.
Палічыць гэтыя праекты, гавораць спецыялісты цэнтра, сёння сапраўды практычна немагчыма. Кожны дзень у санаторый прыязджаюць дзеці з абсалютна рознымі захворваннямі. Хтосьці перанёс найскладанейшую аперацыю на сэрцы, а хтосьці і зусім не можа перасоўвацца без інваліднай каляскі.
А дапамагаюць у рэабілітацыі дзяцей беларускім спецыялістам сёння іх калегі з 13 дзяржаў - ад Ірландыі да Японіі, краіны, дзе зусім нядаўна - у 2011 годзе - таксама адбылася аварыя на атамнай станцыі. Кожны год сябры Надзеі пастаўляюць у нашу краіну найноўшыя медыцынскія прэпараты і абсталяванне.
Праходзяць лячэнне малыя тут круглы год, прычым, на час года навучальнага ў цэнтры адкрываецца звычайная школа. Каб у дзіцяці, які вярнуўся пасля рэабілітацыі дахаты, не паўстала праблем з вучобай.
За 20 гадоў існавання такога міжнароднага праекта ў беларуска-нямецкім аздараўленчым цэнтры Надзея паправілі сваё здароўе больш за 65 тысяч дзяцей. Пачынаючы з невялікага санаторыя, практычна за чвэрць стагоддзя цэнтр стаў не проста адной з самых вядомых здраўніц у свеце. Зараз жа, паводле слоў экспертаў, гэта, бадай, адзіны спецыялізаваны комплекс, дзе з дапамогай найноўшых медыцынскіх тэхналогій могуць дапамагчы дзецям, якія жывуць на тэрыторыях, што пацярпелі ад чарнобыльскай катастрофы.
