Развіццё будаўнічай галіны. Рост вытворчасці на Гомельпрамбудзе

Перспектывы развіцця будаўнічай галіны залежаць ад дакладнага выканання задач кожным працаўніком. Аб гэтым заявіў Уладзімір Кухараў падчас наведвання прадпрыемства "Гомельпрамбуд". Намеснік прэм'ер-міністра азнаёміўся з яго працай і адзначыў, што сёння будаўнічая галіна Беларусі спраўляецца з пастаўленымі задачамі. Так, прадпрыемства ў Гомелі набірае тэмпы развіцця. Калектыў налічвае больш за тысячу чалавек. Спецыялісты працуюць больш як на 15 аб'ектах, задзейнічаныя і на будаўніцтве БелАЭС. У ліку праектаў таксама - спартыўныя і сацыяльныя аб'екты, жыллёвы фонд і кардонная фабрыка ў Добрушы.  Па выніках першага паўгоддзя адзначаны рост вытворчых паказчыкаў.

Уладзімір Кухараў, намеснік прэм'ер-міністра Беларусі: "Ад таго, як эфектыўна будуць будавацца аб'екты, залежыць і фінансавы бок забеспячэння будаўнічай галіны. Гэта эканомія сродкаў, укараненне новых эфектыўных мер і інавацый, якія дазваляюць значна зніжаць расходы ў будаўніцтве. Таму падчас гэтых сустрэч мы аналізуем і выпрацоўваем у тым ліку і нарматыўныя дакументы, якія прымаюцца для развіцця будаўнічай галіны". 

У найбліжэйшы час Гомельпрамбуд увядзе ў лад басейн у Навабеліцкім раёне Гомеля. У планах на наступны год - завяршыць будаўніцтва пажарнага дэпо ў новым мікрараёне ў цэнтры Гомеля.