Пяць грамадзян Беларусі эвакуіраваныя сёння з горада Ухань

Пра гэта паведамляе наша пасольства ў Кітаі. Раней стала вядома, што ўсяго ў правінцыі Хубэй, дзе адбылася ўспышка каранавіруса, знаходзяцца 12 нашых суайчыннікаў. Гэта студэнты, магістранты, людзі, якія прыехалі ў Кітай працаваць, а таксама тыя, хто аказаўся тут транзітам. Паводле паведамлення МЗС Кітая, замежныя грамадзяне могуць пакінуць рэгіёны правінцыі Хубэй на падставе афіцыйнага запыту пасольства. Іншыя краіны, у прыватнасці Расія, Германія і ЗША, таксама праводзяць эвакуацыю сваіх грамадзян.

І сёння ў Кітаі сканчаюцца навагоднія канікулы, якія раней урад Паднябеснай падоўжыў праз небяспечны вірус. Гэта значыць, што перамяшчэнні ў краіне ўзрастуць у сотні разоў. Ужо зараз усе пасажыры цягнікоў дэзынфекуюцца, у іх вымяраюць тэмпературу. Маштабныя меры прымаюцца ў правінцыі Сычуань. Кантроль пасажыраў здзяйсняецца на аўтамагістралях, у сотнях часовых прапускных пунктаў.

Нагадаем, сёння першую ахвяру каранавіруса зафіксавалі па-за Кітаем. На Філіпінах памёр 44-гадовы мужчына з Ухані. Да гэтага ўсе смяротныя выпадкі праз новы вірус прыходзіліся на тэрыторыю КНР. Такім чынам, загінуўшых ужо 304, колькасць інфікаваных падбіраецца да 15 000.