Праваслаўны свет сёння адзначае адно з галоўных хрысціянскіх свят - Вадохрышча. У храмах праходзяць урачыстыя набажэнствы. Па традыцыі ў гэты дзень галоўным атрыбутам становіцца святая вада. Сотні вернікаў апускаюцца ў вадохрышчанскія палонкі і купелі, іншыя проста набіраюць святую ваду з сабой. У гэтыя хвіліны ў храмах працягваюцца шматлюдныя паломніцтвы. Атмасфера свята - у рэпартажы Наталлі Бардзілоўскай.
Адзіны дзень за год, калі акунанне ў ледзяной вадзе не лічыцца маржаваннем. І калі ў кожнай палонцы або купелі чалавек праваслаўны бачыць свой "маленькі Іардан". На Вадохрышча вада становіцца "вялікай агіясмай", тэрмін, які азначае "святыня". Праведзеныя раз аквавыпрабаванні на марозе для шматлікіх ператвараюцца ў штогадовую патрэбнасць і гарант здароўя на ўвесь год.
Ужо другія суткі з куцці - чэргі за вадой. Сістэмы водападачы на прыцаркоўных пляцоўках і ўнутры храмаў - ад мегаполісаў да вёсак. Вада для пяці мільёнаў - столькі праваслаўных у краіне.
Святыні хапае на ўсіх, але атрымаць яе - значыць мець час і цёплае адзенне.
Узятую на Вадохрышча ваду дома размяшчаюць побач з абразамі і ставяць у чырвоным куце. У храмах яе асвячаюць шматгадзіннай урачыстай службай - "Царскія гадзіны", літургія Васіля Вялікага.
Свята святой вады і аднаго з самых галоўных царкоўных таемстваў. Вадохрышча, яно ж Богаяўленне. У старажытныя часы гэты ўрачысты дзень супадаў з Раством, падкрэсліваючы галоўны сэнс - фізічнае нараджэнне непадзельна з нараджэннем духоўным, з прыходам да веры.
Акунаннем у воды хрысцілі яшчэ ў дахрысціянстве. Іаан Прадцеча, апускаючы людзей у воды, ачышчаў іх ад граху. Па нараджэнні бязгрэшны Ісус Хрыстос здзівіў прарока, прыйшоўшы на хрышчэнне. 2 тысячы гадоў таму ў 30-гадовым ўзросце Збавіцель здзейсніў тры важныя рэчы, увайшоўшы ў раку Іардан: даў прыклад пакоры, асвяціў воды сваім дакрананнем, адкрыў, што ён Сын Божы.
У гонар падзеі царква ўсталявала свята Вадохрышча. А хрышчэнне вадой стала першым таемствам на шляху ў хрысціянства. З глыбіні стагоддзяў ідзе і праваслаўная традыцыя хрысціць людзей менавіта 19 студзеня, на Богаяўленне.
Падаюць заяўкі на хрышчэнне, акунаюцца, бяруць ваду. Сёння храмы дзейнічаюць у незвычайным рэжыме - дзверы цэркваў зачыняцца познім вечарам, дзесьці апоўначы. Вось паток на старажытным замчышчы мінскай Нямігі - паміж Свята-Духавым і Свята-Петра-Паўлаўскім саборамі - людзі працягваюць падыходзіць.
