Уся інфраструктура ў мабільным тэлефоне! Жодзіна далучыўся да платформы "Мой горад". Гэта пілотны сервіс для больш камфортнага ўзаемадзеяння паміж насельніцтвам і рознымі арганізацыямі. Так, напрыклад, карыстальнікі смарт-дадатка змогуць запісацца на прыём у гарвыканкам або выклікаць аварыйную брыгаду, удакладніць рэжым працы магазінаў ці пазнаёміцца з культурнай афішай. Усё можна зрабіць за пару клікаў. Для больш зручнага інтэрактыву гарадскую экасістэму структуравалі па відах дзейнасці. Адукацыя і бізнес, медыцына, спорт, турызм - усяго больш за 40 модуляў.
Распрацоўваць канцэпцыю "разумнага горада" ў Жодзіне пачалі два гады таму: інтэрактыўная платформа паскорыла працэс. Ужо зараз у дадатку даступна каля 90 аб'ектаў: праект працягнуць развіваць. Дарэчы, да лічбавай трансфармацыі далучыліся і іншыя рэгіёны. Мабільны дадатак даступны для ўсіх.
