У Магілёве ідзе маштабны рамонт Пушкінскага моста. Да нядаўняга часу ён знаходзіўся ў аварыйным стане, таму і было прынята рашэнне аб пачатку экстраннай рэканструкцыі. Галоўную транспартную артэрыю абласнога цэнтра цалкам не закрылі - пакуль ідзе рамонт правай яго часткі. Будаўнікі ўмацоўваюць апоры, металічныя агароджы, затым цалкам заменяць дарожнае пакрыццё і тратуарную плітку. Да часовай нязручнасці з разуменнем паставіліся аўтамабілісты і пешаходы. Калі мост стане паўнавартаснай шасціпалоснай магістраллю - даведваўся Андрэй Ястрабаў.
Таблічка "Закрыты на рамонт" з'явілася на Пушкінскім мосце ў Магілёве раней за прызначаны тэрмін - адразу пасля таго, як у ваду паваліліся некалькі пралётаў агароджы. Да шчасця, тады ніхто не пацярпеў. Гарадскія ўлады прынялі рашэнне - у экстранным парадку пачаць рэканструкцыю галоўнай транспартнай артэрыі. Зараз тут практычна кругласутачна працуюць будаўнікі.
Сяргей Пічугоў, дырэктар філіяла МБУ №1 г. Магілёва ААТ "Мостабуд": "На дадзеным этапе мы займаемся разборкай маставога палатна і тратуараў, паралельна - пашырэннем бетонавых апор, на якія пасля будуць змантаваныя новыя металічныя бэлькі. У далейшым запланавана зняць увесь жалезабетон і, па сутнасці, будзем мець новы мост".
Аб'ект няпросты. Працаваць прыходзіцца і на самім мосце, і нават пад вадой. Для ўмацавання апорнай часткі моста будаўнікам прыйшлося паглыбіцца ў рэчышча Дняпра на некалькі дзясяткаў метраў. Дарэчы, змялеўшы, ён не толькі дапамог у гэтым будаўнікам, але і адкрыў апоры старога моста, пабудаванага, меркавана, яшчэ ў 41-м.
Мост цалкам не закрылі. Пакуль ідзе рамонт правай яго часткі. Таму транспарт замест звыклых чатырох рухаецца па дзвюх палосах. Вадзіцелі да часовай нязручнасці паставіліся з разуменнем.
Акрамя бюджэтных сродкаў і адлічэнняў за дарожны збор, у фінансавым плане з рамонтам дапамог Банк Развіцця. Што і паскорыла рамонтныя працы.
Уладзімір Цумараў, старшыня Магілёўскага гарвыканкама: "У бягучым годзе мы плануем асвоіць 70 млрд. рублёў на дадзеным аб'екце, а наогул, плануецца ў наступным годзе ўвесь комплекс прац завяршыць. Адпаведна, мяркуецца яшчэ 250 млрд. рублёў".
Паколькі дэмантавалі тралейбусныя лініі, якія ішлі праз мост, прадумалі альтэрнатыву гэтаму віду грамадскага транспарту - дадатковыя аўтобусы і маршруткі.
Усяго ў Магілёве праз Днепр пракладзеныя тры масты. Самым загружаным заўсёды быў гэты - цэнтральны - Пушкінскі. Таму да заканчэння рэканструкцыі ён стане паўнавартаснай шасціпалоснай магістраллю.
