На слыху адразу некалькі гісторый нечалавечай жорсткасці ў дачыненні да братоў нашых меншых. Іх топяць, выкідваюць у акно як непатрэбныя рэчы, закопваюць жывымі або пакідаюць на вуліцы.
Адразу некалькі спраў па фактах жорсткага абыходжання з жывёламі зараз разглядаюць суды Беларусі. Заканадаўства за такія дзеянні стала больш жорсткім два гады таму. За гэты час да крымінальнай адказнасці былі прыцягнуты больш за 10 чалавек.
Праўда, паводле слоў зоаабаронцаў, у большасці выпадкаў вінаватым усё ж удаецца сысці ад пакарання, а тыя гаспадары, што паўстаюць перад судом, плацяць толькі штраф. Аб прыкладах нечалавечай жорсткасці і самых чалавечых распавядзе Аляксандр Камовіч.
Лагодны сабака Арчык з ласкай глядзіць у вочы свайго гаспадара Уладзіміра Лузіна. Хатні гадаванец, паводле слоў мужчыны, адчувае сябе сапраўдным гаспадаром. Сёння Арчык выглядае бадзёрым і гуллівым, але літаральна некалькі гадоў таму сабака прайшоў сапраўднае пекла. Папярэднія гаспадары пакінулі сабаку без пярэдняй лапы, а замест ланцужка выкарыстоўвалі калючы дрот.
Сёння Арчык і яшчэ дзясяткі сабак і кошак здабылі ў прамым сэнсе другое жыццё. Кожны з тутэйшых гадаванцаў быў асуджаны на смерць, калі б у нейкі момант у іх лёс не ўмяшалася Іна Шляхта. Жонка Уладзіміра па адукацыі ветэрынар, з самога дзяцінства марыла працаваць з жывёламі. Пасля ж пераезду на хутар сям'я стала папаўняцца бяздомнымі гадаванцамі.
Жыццё гэтых гадаванцаў - гэта яркі прыклад нечалавечай жорсткасці і ў той жа час самых чалавечных якасцяў людзей. Адны ратуюць, іншыя забіваюць. У тым жа Валожынскім раёне адбыўся інцыдэнт, які ўзрушыў усю акругу. У вёсцы Капусціна 61-гадовы мужчына ўтапіў сабаку ў студні.
Паводле слоў праваахоўнікаў, у той дзень мужчына быў настроены рашуча. Спачатку ён хацеў утапіць сабаку ў суседскай студні, аднак яго планам перашкодзіла мясцовая жыхарка. Тады ён знайшоў іншую студню, падышоў, адкрыў вечка і кінуў безабаронную жывёліну ў ваду. Пасля інцыдэнту жыхары вырашылі павесіць на люк замок.
У дачыненні да пенсіянера была ўзбуджана крымінальная справа па артыкуле "Жорсткае абыходжанне з жывёлінамі". Падчас працэсу сваю віну мужчына прызнаў, пры гэтым адзначыў, што жывёлін не любіць. За забойства сабакі мужчына атрымаў штраф - крыху менш за тысячу рублёў.
Варта адзначыць, што адразу некалькі крымінальных спраў за жорсткае абыходжанне з жывёлінамі зараз разглядаюцца ў Следчым камітэце. Адно з апошніх узбуджана ў дачыненні да мінчаніна, які выкінуў шчаня з 5-га паверха на вуліцы Скрыпнікава. Паводле інфармацыі праваахоўнікаў, напярэдадні здарэння падазроны выпіваў у кампаніі жанчыны і прыяцеля. Падчас застолля ён схапіў гадаванца знаёмай і выкінуў у акно. Ад атрыманых траўм такса памерла на месцы.
Яшчэ адна крымінальная справа ўзбуджана ў дачыненні да 56-гадовага мінчаніна па падазрэнні ў забойстве кацяняці. Інцыдэнт адбыўся ў сталіцы ля пад'езда дома па вуліцы Русіянава. Паводле інфармацыі праваахоўнікаў, падазроны мужчына схапіў гадаванца і некалькі разоў стукнуў галавой аб сцяну. Ад атрыманых траўм жывёліна загінула. Пры гэтым рабіў гэта мужчына на вачах прахожых. Як пазней высветлілі следчыя, мужчына быў п'яны.
Крымінальную адказнасць за забойства жывёлін у Беларусі ўвялі ў 2015. З гэтага часу ў судах разгледжана больш за 10 адпаведных спраў. Яшчэ больш за 200 выпадкаў кваліфікаваліся як адміністрацыйныя парушэнні. Праўда, па ўсёй строгасці закона ніхто так і не адказаў. Зоаабаронцы наракаюць, што забойцы жывёлін, як правіла, могуць заплаціць ўсяго толькі штраф.
Валанцёры адзначаюць, што ў іншых краінах пакаранне за жорсткае абыходжанне з жывёламі значна больш сур'ёзнае. У Расіі закончыўся гучны працэс над так званымі хабараўскімі жывадзёрамі. З матэрыялаў працэсу вядома, што дзве непаўналетнія дзяўчыны і хлопец знаходзілі гадаванцаў па аб'яве "аддам у добрыя рукі", а затым самым зверскім спосабам здзекаваліся і забівалі безабаронных жывёлін. На іх рахунку дзясяткі сабак, кошак і птушак. У фінале гісторыі абвінавачаныя атрымалі рэальныя тэрміны - ад 3 да 4 гадоў калоніі.
Часта выпадкам жорсткага абыходжання з жывёлінамі спадарожнічае алкаголь, пры гэтым псіхолагі напрамую звязваюць такія паводзіны з выхаваннем чалавека. Што ж тычыцца кантралюючага моманту, то зараз беларускія парламентарыі працуюць над законапраектам "Аб абыходжанні з жывёламі", у якім будуць дакладна прапісаны не толькі правы, але і абавязкі гаспадароў хатніх гадаванцаў. І можа тады кожны чалавек зразумее адну простую ісціну - мы ў адказе за тых, каго прыручылі.
