"Слова нас аб’ядноўвае" - дэвіз свята, якое сабрала сёння тысячы беларусаў на Дзень пісьменства ў Капылі.
Ужо вядомыя імёны ўладальнікаў Нацыянальнай літаратурнай прэміі, афіцыйна адкрыты помнік Цішку Гартнаму і інтэрактыўная алея пісьменнікаў Капыльскага раёна. Кожныя дзесяць хвілін свята прэзентуюцца новыя кнігі, а на пляцоўках нон-стоп чытаюць на мове. Што з нестандартнага ў афішы традыцыйнага нацыянальнага свята - ведае мая калега Лідзія Заблоцкая.
80-годдзе з пачатку Вялікай Айчыннай - чырвонай ніткай у канцэпцыі Дня беларускага пісьменства. І пра страшныя падзеі ў Капылі не толькі гавораць. Наша здымачная група - на гістарычнай падзеі. У рамках фестывалю ўпершыню ваенна-гістарычная рэканструкцыя.
Лейтматыў Дня беларускага пісьменства - 80-годдзе пачатку Вялікай Айчыннай вайны
Свой міні-філіял на колах даставіў у Капыль і музей Вялікай Айчыннай. Акрамя арыгінальнай зброі і трохвугольнікаў з 40-х, вершы ў пажоўклых кнігах, якія літаральна ратавалі ў баях.
Нацыянальную літаратурную прэмію ўручылі ў Капылі
У суседнім квартале размясцілі галоўную сцэну. Прастора для адкрыцця і закрыцця фестывалю. Дарэчы, ужо сталі вядомыя ўладальнікі Нацыянальнай літаратурнай прэміі. Лепшымі больш як з 50 прэтэндэнтаў сталі 6 літаратараў. Так, дэбют за Кацярынай Стройлавай, лепшы ў публіцыстыцы - экс-міністр адукацыі Аляксандр Радзькоў. Адзначылі і прозу Віктара Праўдзіна, узнагарода за паэзію - за Віктарам Шніпам.
Амаль 5 тысяч гасцей прымаюць удзел у свяце
Капыль пабіў чаканы рэкорд у 5 тысяч гасцей. Не толькі раскупліваюць кнігі і батляцца вершамі. З дапамогай смартфонаў і QR-кодаў падарожнічаюць па горадзе. Дарэчы, яшчэ адна навінка свята - яго віртуальнасць.
Горад будзе сёння чытаць да 9 вечара. Кульмінацыя - цырымонія закрыцця, дзе артысты эстрады пад акампанемент Прэзідэнцкага аркестра дадуць саўндтрэкі да беларускіх фільмаў. Праспяваюць разам увесь залаты фонд нашага сінема. Песня - адзін з элементаў, які аб'ядноўвае беларусаў падчас Дня беларускага пісьменства. Вы яшчэ можаце паспець і праспяваць разам з фестывальным Капылём.
