Няпростая сітуацыя, якую можна назваць экалагічным бедствам, склалася на вадаёмах у Сенненскім і Івацэвіцкім раёнах. Там зафіксаваныя выпадкі масавай гібелі рыбы. У паўночным рэгіёне з возера Карасёва адталыя воды выносяць сотні падводных насельнікаў. Спецыялісты гавораць аб моры рыбы з-за недахопу кіслароду. А вось што стала прычынай гібелі плоткі і ляшча на канале Агінскага, пакуль устанаўліваецца.
Вольга Маслоўская больш падрабязна. Ланцужок лясных азёр зблізку вёскі Нярэйша. Адно з іх - Карасёва - зараз ледзь ці апраўдвае сваю "рыбную" назву. Вадаём стаў месцам сапраўднага экалагічнага бедства. Адталыя воды выносяць вялізную колькасць мёртвай рыбы.
Акунь, плотка, чырвонапёрка. Такую карціну мясцовыя жыхары назіраюць кожную вясну: сыходзіць лёд, усплывае мёртвая рыба.
Гэтыя фатаграфіі зрабілі аматары падлёднай лоўлі. Яны першымі ў гэтым сезоне забілі трывогу. Рыба, якую не з'елі птушкі і лісы, гніе. Аб прычынах мору мясцовыя жыхары нават не варожаць: прадпрыемстваў і ферм паблізу няма, а значыць, рыба загінула ад удушша.
Фактам мору рыбы зацікавіліся спецыялісты Віцебскай міжраённай інспекцыі аховы жывёльнага і расліннага свету. У тэлефоннай гутарцы сказалі, што правядуць праверку. А мясцовыя эколагі сітуацыю называюць патавай. Возера дробнае, зарастае, дно глеістае. Кіслароду ў такой вадзе мала. А зімой з-за лёду ён не паступае зусім. І нават дзедаўскі метад - секчы ў лёдзе шматлікія лункі - лічаць, што ледзь дапаможа насельнікам вадаёма.
Спецыялісты гавораць: другое дыханне ў возера Карасёва адкрыецца ў выпадку, калі яно стане месцам прамысловай здабычы сапрапелю. Бо пад невялікім пластом воды сяміметровыя паклады каштоўнага прыроднага ўгнаення. Пошукі праведзеныя, праект ёсць. Шукаюць фундатара.
Яшчэ адзін беларускі вадаём - канал Агінскага ў Івацэвіцкім раёне - стаў месцам масавай гібел рыбы. На паверхню вады ўсплыло паўтысячы асобін плоткі, карпа, таўсталобіка. Праўда, тут прычыны бедства не такія відавочныя.
Рыбалоўныя ўгоддзі знаходзяцца ў карыстанні нацыянальнага парку "Белавежская пушча". Паблізу ёсць фермы і палі сельгаспрадпрыемства, але размешчаныя яны па-за прыродаахоўнай зонай. Чаму загінула рыба - гэты рэбус пакуль не могуць разгадаць нават спецыялісты.
Праліць святло на амаль дэтэктыўную гісторыю павінны экспертызы. Вынікі лабараторных аналізаў вады і глебы канала будуць вядомыя праз тыдзень.
