Урачыстасці ахапілі дзясяткі лакацый у кожным раёне Мінска. Дзень горада стаў і днём адкрыццяў. У Маскоўскім раёне пачаў працаваць абноўлены міжшкольны стадыён для адточвання майстэрства адразу ў некалькіх відах спорту - валейболе, баскетболе, міні-футболе. Юныя спартсмены ацэняць і прафесійнае поле для футбола. Для аматараў актыўнага адпачынку ля стадыёна размясцілі трэнажоры і пляцоўку для варкаўта.
Падведзены вынікі конкурсу "Мінчанін года"
Заслужаныя ўзнагароды атрымалі жыхары Мінска, якія сваёй самаадданай працай і павагай да роднага горада ўзбагачаюць яго і працягваюць лепшыя традыцыі беларускай сталіцы. На сцэну ў купалаўскім парку падняліся 13 лаўрэатаў, сярод якіх урач, настаўнік, машыніст - інструктар метро, алімпійская чэмпіёнка. Кожны з іх уладальнік звання "Мінчанін года".
Цэнтрам святкаванняў па традыцыі стала пляцоўка каля Палаца спорту. А ў Верхнім горадзе прайшоў фестываль нацыянальных культур. Свой каларыт прадэманстравалі 25 дыяспар. Традыцыі, кухня і рамёствы. Так, усяго за пару гадзін можна было ажыццявіць падарожжа на тысячы кіламетраў.
Акрамя традыцыйных пляцовак, знайшлося месца і для творчых эксперыментаў. Свой праект падрыхтавалі ў Белдзяржцырку. Наведвальнікам паказалі двухгадзінную праграму, але не толькі на манежы. У фае размясціліся інтэрактыўныя зоны, выстава касцюмаў, прайшлі майстар-класы. Дзеці і дарослыя змаглі паразмаўляць з артыстамі, разгледзець рэквізіт і даведацца сакрэты фокусаў.
