Анамальная спякота ўсё часцей стала прыводзіць да трагедый на вадзе. Паводле аператыўных звестак АСВОД, па краіне толькі за суткі патанулі 10 чалавек, у тым ліку адно дзіця. У Мінскай вобласці чацвярых чалавек не змаглі выратаваць.
Так, следчыя разбіраюцца ў акалічнасцях НЗ ва Уздзенскім раёне, дзе ў рацэ мясцовыя жыхары выявілі целы жанчыны і 7-гадовага дзіцяці, хлопчык знаходзіўся на апецы.
У сувязі з пачаткам купальнага сезона рэзка ўзрос прыток адпачывальнікаў ля вадаёмаў, і адпаведна, павялічылася колькасць няшчасных выпадкаў: 72 чалавекі патанулі - і толькі за чэрвень. Як адзначаюць ратавальнікі, асноўнымі прычынамі гібелі людзей на вадаёмах па-ранейшаму застаюцца: алкагольнае ап'яненне, дзеці без нагляду дарослых, купанне ў забароненых месцах і проста незахаванне мер асабістай бяспекі. У гэтыя гарачыя дні МНС, міліцыя і АСВОД практычна кругласутачна дзяжураць у месцах адпачынку, асабліва ля вады.
