Сталіца рыхтуецца да Дня горада. Усяго запланавана больш за 130 мерапрыемстваў. Галоўныя святочныя пляцоўкі па традыцыі разгорнуцца ў цэнтры Мінска.
Палац спорту парадуе гасцей музычным і гастранамічным нон-стопам. Стартуе ён апоўдні. А шумець гандлёвыя рады з пачастункамі і сувенірамі ручной працы будуць да позняга вечара.
У гэты ж час каларытна будзе і ў Верхнім горадзе. Гледачоў збярэ фестываль нацыянальных культур. Там прадэманструюць традыцыйныя стравы і рамёствы, абрады і танцы. У вячэрняй афішы канцэрт Нацыянальнага акадэмічнага канцэртнага аркестра Беларусі пад кіраўніцтвам Міхаіла Фінберга.
Фінальны акорд свята прагучыць у 22:00. Феерверк дадуць у скверы Старосцінская слабада (недалёка ад гасцініцы "Беларусь"). Зрэшты, маляўніча і атмасферна ў Мінску ўжо зараз. Як сталіца змяняецца да Дня горада, што яшчэ трапіла ў афішу - даведалася Алена Вітко.
40-метровае пано і фотаінсталяцыі, аб'ёмныя зоркі і радыусныя пілоны. Усе гэтыя арт-кампазіцыі займаюць сваё месца: Мінск рыхтуецца да Дня горада. Колеравая гама свята пераклікаецца з геральдыкай сталіцы, а таксама з каларытам восені. У графіцы гэта адлюстроўвае і стылізаваны кляновы ліст. Тут жа сілуэты славутасцей Мінска: вароты на Прывакзальнай плошчы, Кафедральны сабор, ратуша.
Ужо заўтра да вечара сталіца паўстане ў завершаным вобразе. Апошнія штрыхі застаюцца і ў праграме мерапрыемстваў. Іх запланавана больш за 130. Асноўныя, вядома, у суботу.
Інтэрактыўныя выставы і гасцінныя кірмашы, спартыўныя спаборніцтвы і квесты. Open air будуць як раённыя, так і гарадскія.
Цэнтральная святочная лакацыя разгорнецца ля Палаца спорту. Зараз тут манціруюць сцэну з пяці пляцовак. Такі комплекс з'явіцца ўпершыню. Гэта дазволіць стварыць аб'ёмнае шоу. Так, у Дзень горада музычны фестываль будзе шумець 10 гадзін нон-стоп. Праграма разлічана на моладзь і сямейны адпачынак.
Каларытны фестываль ля ратушы аб'яднае культуры розных нацыянальнасцей. На свяце будуць прадэманстраваны традыцыйныя стравы, песні і танцы 25-ці краін.
Яркі фінал у Дзень горада забяспечыць феерверк. Асвеціцца неба ў 22:00 над скверам Старосцінская слабада. А ўжо ў нядзелю святочная эстафета набудзе спартыўныя фарбы. На нізкім старце Мінскі паўмарафон.