Ад Уфы да Магнітагорска. Другі этап аднаго з галоўных ралі-рэйдаў свету - "Шаўковы шлях" - прайшоў паміж гэтымі двума гарадамі Расіі. Агульная працягласць склала 571 км, а спецучастак расцягнуўся на 245 км, старт прайшоў прама ля падножжа Уральскіх гор. Беларускі экіпаж "МАЗ-СПОРТ аўта" пад кіраўніцтвам Сяргея Вязовіча фінішаваў на трэцім месцы. Ад пераможцаў - каманды "КАМАЗ-майстар" расіяніна Андрэя Каргінава - адставанне ў 4 хвіліны 50 секунд. Другім да Магнітагорска дабраўся пяціразоваы пераможца ралі "Дакар" расіянін Эдуард Нікалаеў. Нагадаем, першы этап Вязовіч завяршыў таксама ў першай тройцы - ён стаў другім. Вышэй на стартавым спецучастку быў іншы экіпаж "МАЗ-СПОРТ аўта" - Аляксея Вішнеўскага.
9 ліпеня ўдзельнікаў ралі-рэйду чакае трэці этап. Ён пройдзе па Магнітагорску, а дыстанцыя складзе 346 км. Сёлета маршрут "Шаўковага шляху" пралягае па дзевяці гарадах. А завершыцца ралі 15 ліпеня ў Маскве.
