Галоўныя ўрачыстасці з нагоды Дня Незалежнасці пачнуцца роўна ў 11 у сталіцы з ускладання вянкоў да манумента Перамогі. Прамую трансляцыю цырымоніі пакажа Белтэлерадыёкампанія.
На плошчы ўжо працуюць камеры Агенцтва тэленавін, і зараз на прамую сувязь са студыяй выходзіць наш карэспандэнт Андрэй Крывашэеў (прамое ўключэнне).
Мы знаходзімся на плошчы Перамогі. Менавіта тут, на гэтым святым для кожнага беларуса пятачку сталіцы, сёння пачнуцца ўрачыстыя мерапрыемствы, прысвечаныя Дню Незалежнасці. Менш чым праз 2 гадзіны да п'дэстала абеліска Перамогі лягуць вянкі ад Кіраўніка дзяржавы, урада, абедзвюх палат беларускага парламента, замежных дыпламатаў, рэлігійных канфесій і грамадскіх аб'яднанняў нашай краіны. Галоўнае дзяржаўнае, народнае і сямейнае свята суверэннай Беларусі - менавіта так сёння ўспрымаецца Дзень Незалежнасці - Дзень Рэспублікі. З 1996 года ён адзначаецца ў Дзень вызвалення Мінска ад нямецка-фашысцкіх захопнікаў і сімвалізуе адзінства франтавога пакалення вызваліцеляў і новых пакаленняў беларусаў, якія будуюць сучасную дзяржаву. Варта адзначыць, што ўсяго за год Беларусь значна ўмацавала свой рэальны суверэнітэт і аўтарытэт у Еўропе і свеце. Так, з 1 студзеня пры нашым актыўным удзеле пачала дзейнічаць новая інтэграцыя - Еўразійскі эканамічны саюз. Прычым менавіта Беларусь - яго першы старшыня. Па-другое, менавіта за гэтыя 12 месяцаў наша незалежнасць умацоўвалася новымі сувязямі, пагадненнямі і праектамі з такімі гігантамі, як Кітай, Індыя і Пакістан. Досыць успомніць нядаўнія гістарычныя візіты ў Беларусь лідараў Сі Дзіньпіна і Пранаба Мукерджы. Па-трэцяе, менавіта ў бягучым годзе афіцыйны Мінск заручыўся падтрымкай саюзнікаў для павышэння статусу ў Шанхайскай арганізацыі супрацоўніцтва, а гэта самая перспектыўная інтэграцыйная пляцоўка ў свеце. Важна, што нават пры трагічных знешніх выкліках і пагрозах Беларусь засталася верная прэзідэнцкаму прынцыпу: "інтэграцыі - інтэграцый". Гэта значыць, збліжэнню інтарэсаў на ўсёй прасторы Еўразіі. Сёння Беларусь актыўна нармалізуе адносіны з нашымі заходнімі партнёрамі. Па ліку візітаў на вышэйшым і высокім узроўні відавочна пабіты рэкорд папярэдніх гадоў. За гэтыя ж 12 месяцаў Беларусь трывала ўвайшла ў палітычны слоўнік свету як краіна - "еўрапейскі донар стабільнасці". "Мінскі фармат" і "мінскія пагадненні" па Украіне - гэта новая дыпламатычная і палітычная лексіка і рэальнасць. Нягледзячы на эканамічныя складанасці, у Беларусі не згорнутыя праграмы маштабнай мадэрнізацыі рэальнага сектара - ад атамнай энергетыкі да машынабудавання і АПК. Гэта працуе на наш эканамічны суверэнітэт. Падводзячы вынікі яшчэ аднаго года незалежнай Беларусі, можна сказаць, што ў галоўнае дзяржаўнае свята ў беларусаў досыць падстаў ганарыцца яго вынікамі. Мы будзем сачыць за ўсімі ўрачыстасцямі ў сталіцы і рэгіёнах - аб гэтым у найбліжэйшых выпусках навін. А вось урачыстую цырымонію ўскладання вянкоў адсюль, з плошчы Перамогі, мы пакажам у прамым эфіры. Са святам, Беларусь! З Днём Незалежнасці!
