Маштабны фестываль "Вытокі. Крок да Алімпу" прымаюць гэтымі днямі Касцюковічы.
Першы дзень арганізатары па традыцыі прысвяцілі прэзентацыі райцэнтра. Прэс-тур стартаваў з наведвання гіганта прамысловасці - Беларускага цэментнага завода. Госці пабывалі і на радовішчы "Камунарскае", наведалі раённы краязнаўчы музей. А яшчэ Касцюковічы - малая радзіма паэта Аркадзя Куляшова. Яго словы гучаць у знакамітай "Алесі" "Пясняроў".
Упрыгожыла першы дзень фестывалю і прэзентацыя мясцовых раённых святаў, галоўным героем аднаго з іх стаў гусак. А яшчэ гасцей на адной з этнапляцовак чакаў гастраквэст "Скібка ад Вытокаў" з дэгустацыяй страў нацыянальнай кухні.
На цэнтральнай плошчы разгарнуўся мастацкі інтэрактыў "Гуляйце з намі - малюйце самі". Завяршыўся першы дзень фестывалю спектаклем Моладзевага тэатра эстрады "Брыялін" і паказам спартыўнай стужкі ў кінатэатры пад адкрытым небам.
19 жніўня вялікае свята прадоўжыцца. Больш за 30 пляцовак прымуць гасцей і ўдзельнікаў.