У школьнікаў пачалася новая вучэбная чвэрць. Каб дзеці трапілі на заняткі, а не ў ДТЗ, сочаць не толькі бацькі, але і супрацоўнікі Дзяржаўтаінспекцыі. Так, у сталіцы яны патрулююць пешаходныя пераходы і праезную частку побач з навучальнымі ўстановамі. У прафілактычны рэйд адправілася і наша здымачная група. Тэму працягне Таццяна Бажко.
Дарожныя знакі, разметка, агароджы і шлагбаумы. Вось такі бяспечны шлях да ведаў для юных мінчан стварылі інспектары ДАІ на вуліцы Алібегава. Побач дзве сталічныя школы - 145 і 67. У Маскоўскім раёне Мінска ў першыя навучальныя дні пасля школьных канікул асаблівая ўвага да навучальных устаноў, якія знаходзяцца побач з праезнай часткай.
Асабліва пільна за бяспекай сочаць у самы гарачы час – перад пачаткам заняткаў. Юным пешаходам нагадаюць, што пераходзіць дарогу патрэбна толькі на зялёны сігнал святлафора, а таксама мець пры сабе флікер.
Папярэдзіць ДТЗ дапаможа і верхняя вопратка яркага колеру – чырвонага, аранжавага ці жоўтага. Дарэчы, экскурс у правілы дарожнага руху зацікавіў не толькі вучняў, але і іх бацькоў.
Пра дарожную грамату дзецям раскажуць і настаўнікі на тэматычных дадатковых занятках.
Тэст на выкананне ПДР чакае і вадзіцеляў. Яны абавязкова павінны выконваць бяспечны хуткасны рэжым пры пад’ездзе да навучальных устаноў. Інспектары пракантралююць не толькі пешаходныя пераходы, але і правільнасць перавозкі юных пасажыраў, у прыватнасці, наяўнасць дзіцячага аўтакрэсла. Экіпажы ДАІ будуць працаваць ва ўзмоцненым рэжыме да 13 студзеня.