Напярэдадні рэспубліканскага суботніка беларусы ўжо пачалі актыўна наводзіць парадак на сваёй зямлі. У Год малой радзімы кожны можа ўнесці свой уклад у развіццё блізкіх сэрцу месцаў. У паўночным рэгіёне сёння працавалі на тэрыторыі мемарыяла ў Расонах і комплексе "Рыленкі" ў Дубровенскім раёне. Гэтыя месцы захоўваюць памяць аб падзеях Вялікай Айчыннай вайны. Частка заробленых сродкаў пойдзе на іх рэканструкцыю. Марына Раманоўская - пра ўклад кожнага ў агульную справу.
599-ы кіламетр аўтамагістралі Брэст - Мінск - Масква. Увагу тых, хто праязджае, здалёку прыцягваюць бетонныя стэлы.
Гісторыю гэтага месца ў Дубровенскім раёне ведае кожны. У гады Вялікай Айчыннай вайны дзевяць месяцаў тут стаяў фронт. Ішлі жорсткія баі.
Памяць аб загінуўшых захоўвае мемарыяльны комплекс "Рыленкі". Яго адкрыццё адбылося 3 ліпеня 45 гадоў назад. Гэта адна вялікая брацкая магіла. Плошча мемарыяла - тры гектары. І кожны сантыметр зямлі памятае аб мужнасці герояў.
Ля ўваходу на тэрыторыю мемарыяла - вароты з рэльефнымі малюнкамі твараў воінаў. Уздоўж дарогі ўсталяваныя чатыры стэлы - кожная сімвалізуе подзвіг. У аснове кампазіцыі - пліты, на якіх ушанаваны прозвішчы больш як дзесяці тысяч загінуўшых. Але дакладная колькасць пахаваных тут салдат і афіцэраў невядома.
Праца па увекавечанні памяці ў Дубровенскім раёне не спыняецца. За апошнія гады атрымалася ўсталяваць мноства імёнаў загінуўшых. У 2011 годзе на тэрыторыі мемарыяла з'явілася беласнежная капліца. Прыйшоў час абнаўлення і самога месца ўсенароднай памяці. Капітальнага рамонту тут не было з моманту адкрыцця. Частка сродкаў, заробленых на суботніку, пойдзе на рэканструкцыю мемарыяла.
Шматлікія жыхары навакольных вёсак узяліся за інструмент, не чакаючы выхадных. Пасля зімы працы тут асабліва шмат. Перш за ўсё энтузіясты прыбіраюць лісце, і нават ветранае надвор'е - не перашкода. Прыводзіць вялізную тэрыторыю ў парадак прадоўжаць на суботніку.
Гэты рэспубліканскі суботнік пройдзе пад знакам малой радзімы. Зрабіць свой рэгіён прыгажэйшым пад сілу кожнаму. Як бонус - прыемная кампанія і зарадка на свежым паветры.
