Афіцыйны Будапешт выступае за істотную актывізацыю адносін Беларусі і Еўрасаюза. Такую пазіцыю выказаў у эксклюзіўным інтэрв'ю "Галоўнаму эфіру" Міністр замежных спраў і знешняга гандлю Венгрыі Петэр Сіярта.
Дыпламат падрабязна растлумачыў, за кошт чаго вобраз нашай краіны на Захадзе становіцца ўсё больш пазітыўным, як паляпшэнне палітычнага іміджу можна манетызаваць. Кіраўнік венгерскага МЗС таксама распавёў, чаму будучыня ўсёй Еўропы залежыць ад паспяховага ўвасаблення ў жыццё беларускай ініцыятывы "Інтэграцыі інтэграцый".
Петэр Сіярта, Міністр замежных спраў і знешняга гандлю Венгрыі: "Гэта відавочна, што калі Еўропа хоча вярнуць сабе хоць бы частку страчанай канкурэнтаздольнасці, то мы павінны паляпшаць супрацоўніцтва паміж Усходам і Захадам кантынента. Я думаю, менавіта Беларусь з'яўляецца ідэальным мостам або ідэальным архітэктарам моста паміж Усходам і Захадам. Фактычна, Мінск ужо стаў сінонімам надзеі на мір ва Украіне. Мне здаецца, ні адна іншая сталіца не згадваецца так часта, калі размова заходзіць аб адносінах паміж усходняй і заходняй часткамі Еўропы".
Як Будапешт аказаўся пад пагрозай санкцый Бруселя? Чаму Венгрыя робіць стаўку на атамную энергетыку? Каму выгадна заблытаць еўрапейскія газавыя патокі і трубы ў тугі вузел? Вялікае інтэрв'ю з кіраўніком венгерскага МЗС Петэрам Сіярта глядзіце ў "Галоўным эфіры" ў гэтую нядзелю на "Беларусь 1".
