Ідэю сёння агучылі ў Мінску падчас адкрытага дыялогу, прысвечанага дню нараджэння самага моладзевага грамадскага аб'яднання краіны. Таксама тут падвялі вынікі працы за 14 гадоў. А лічбы ўражваюць. Сёння БРСМ - гэта 500 тысяч чалавек, якія ўдзельнічаюць ва ўсіх сферах жыцця краіны. Тут развіваюць інавацыйныя праекты, дапамагаюць знайсці інвестара для сваёй ідэі і, вядома, не застаюцца ў баку ад важных палітычных падзей. Пра планы і вынікі - рэпартаж Ксеніі Рабчынскай.
Ксеніі Сафонавай яшчэ толькі 22, але яна ўжо, па сутнасці, бізнес-вумен. З камандай з 20 энергічных і маладых яны робяць лінію эксклюзіўных беларускіх вышыванак. Ідэя стала магчымай на практыцы пасля ўдзелу ў конкурсе "100 ідэй для Беларусі". Сёння адзенне ў маладой, але амбіцыйнай каманды, заказваюць нават за мяжой.
Ідэя Ксеніі - толькі адна з сотняў тых, што сёння аб'яднаныя ў сапраўдныя інкубатары ініцыятыў. "100 ідэй для Беларусі" за гады існавання перарос фармат лакальнага конкурсу: гэта сотні праектаў, якія не засталіся на паперы, а працуюць на практыцы. Па сутнасці, банк ідэй, цікавы як інвестарам, так і бізнесменам.
Алеся Віннік, каардынатар конкурсу "100 ідэй для Беларусі" ГА "БРСМ": "Кожны год у нас ёсць свая спецыфіка. Летась мы праводзілі конкурс у аб'ектах інавацыйнай інфраструктуры, гэта былі тэхнапаркі. Сёлета мы бачым вялікую зацікаўленасць з боку бізнесу і інвестара, які заняты ў малым і сярэднім прадпрымальніцтве. Праекты "100 ідэй для Беларусі" плаўна пераходзяць у пэўныя суб'екты гаспадарання. Так, нашы хлопцы і дзяўчаты ствараюць прадпрыемствы, сёння яны ствараюць новыя рабочыя месцы, сёння яны атрымліваюць хоць невялікі - гэта першыя крокі - але прыбытак".
І яшчэ такое важнае адчуванне, што твае ідэі патрэбныя і важныя. Наступны крок пад брэндам "100 ідэй" - ужо зроблены. Раз на два гады бізнес-інкубатары розных краін будуць аб'ядноўвацца пад лагатыпам конкурсу "100 ідэй для СНД" - першы прайшоў у Мінску сёлета. Яшчэ адна ініцыятыва, якую гатовыя падтрымаць у Саюзе моладзі, - стварэнне партала, дзе анлайн можна было б зарэгістравацца для ўдзелу ў любым з праектаў, прапанаваць нешта новае - і быць пачутым. У Саюзе моладзі гатовыя падтрымаць праект фінансава - засталося толькі сабраць лепшыя ідэі для новага моладзевага агрэгатара.
А гэтая праца вядзецца афлайн. За тым, каб рэальна зарабіць - не толькі грошы, але і вопыт, і новыя знаёмствы. За тры гады працы на Усебеларускай моладзевай будоўлі тут пабывала ўжо 1000 маладых людзей. Прычым, сёлета на пляцоўцы будаўніцтва Беларускай АЭС працавалі не толькі маладыя людзі з Беларусі, але і з Расіі і Казахстана.
Тут, у адной са сталічных бальніц, такога размаху няма, але затое самая сапраўдная проба сябе ў прафесіі - медыцынскія студатрады - новы кірунак моладзевага руху. У абавязкі ўваходзіць: дапамога медсёстрам і, вядома, жаданне вучыцца.
Усяго ж толькі летась у Саюзе моладзі дапамаглі знайсці часовую працу 70 000 юнакоў і дзяўчат. Гэта не толькі рамантыка вялізнай будоўлі - маладыя людзі дапамагалі праводзіць археалагічныя раскопкі, удзельнічалі ў міжнародных выставах, дапамагалі ўзводзіць бальніцы.
А гэтыя людзі з па-сапраўднаму добрымі сэрцамі ў гэты час працуюць над стварэннем новых касцюмаў і рэпеціруюць спектакль. Не вялікай сцэны дзеля - бальнічнага калідора або актавай залы інтэрната. Менавіта там валанцёры руху "Добрае сэрца" дораць усмешку тым, каму зараз патрэбна цёплае слова і падтрымка.
А яшчэ - яны дапамагаюць ратаваць жыцці - аб'ядноўваючы на дабрачынныя марафоны "Усе фарбы жыцця для цябе" ўсіх неабыякавых беларусаў.
Акрамя таго, плануюць працягваць удзел у падзеях міжнароднага ўзроўню - валанцёры ў чырвоных суколках, якія дапамагаюць знайсці дарогу турысту, запомніліся шматлікім яшчэ з чэмпіянату свету па хакеі - 2014. Зусім хутка маладыя людзі з добрым веданнем замежнай атрымаюць сваю ўласную пляцоўку - асацыяцыю маладых перакладчыкаў. Ім будуць дапамагаць развівацца ў прафесіі і прыцягваць для ўдзелу ў знакавых падзеях. Напрыклад, яны змогуць прыняць удзел у 45-ай Генасамблеі Еўрапейскіх алімпійскіх камітэтаў, якая пройдзе ў Мінску.
Але, мабыць, самы яркі праект Саюза моладзі за апошнія гады - гэта "Кветкі Вялікай Перамогі". Сімвалам акцыі стаў яблыневы цвет - а адной з ключавых падзей, якой змаглі парадавацца літаральна ў кожным кутку краіны, - прыпынак музея-буса, фактычна музея на колах. Фінальным прыпынкам стаў міжнародны лагер "Беларусь" на мяжы нашай краіны, Латвіі і Расіі.
Не змаглі застацца ў моладзевым аб'яднанні ў баку і ад галоўнай палітычнай падзеі года. Тут перакананыя, аддаць свой голас павінен кожны беларус, неабыякавы да лёсу сваёй краіны.
Сяргей Клішэвіч, другі сакратар ЦК ГА "БРСМ": "Калі сёння гаварыць, гэта больш за тры з паловай тысяч - гэта нашы прадстаўнікі ва ўсіх участковых камісіях усіх узроўняў, больш за шэсць тысяч чалавек - гэта тыя нашы людзі, якія сёння ўдзельнічаюць у выбарчай кампаніі ў якасці назіральнікаў. Калі гаварыць пра пікеты, то гэта лічба каля 20 тысяч чалавек сёння прыняла ўдзел у нашых пікетах па ўсёй краіне. Гэта тыя, хто арганізоўваў, займаўся, выходзіў на вуліцы, агітаваў, заклікаў людзей прыняць удзел у выбарах".
І абавязкова не заставаўся ў баку і ад магчымасці выказацца і быць пачутым падчас адкрытых дыялогаў - ужо брэнда Саюза моладзі. Дзясяткі сустрэч з палітыкамі, спартсменамі, прадстаўнікамі бізнесу прайшлі па ўсёй краіне. І тут можна задаваць любыя пытанні, прапаноўваць самыя смелыя ідэі - галоўнае, гавораць, разуменне і канструктыўнасць.
Сёння моладзь Беларусі працуе і над новым фарматам адкрытага дыялогу - ён можа стаць асновай для ўзаемадзеяння беларусаў і дзяржавы, магчымасці зносін і атрымання зваротнай сувязі. Усе гэтыя амбіцыйныя праекты - вынік працы вялізнай паўмільённай каманды юнакоў і дзяўчат па ўсёй краіне ўсяго за 14 гадоў. Планаў - мноства, традыцый - яшчэ больш. І тут упэўненыя: захаваць лепшае - змогуць! Бо найважнейшага: сіл, энергіі і жадання ствараць новае - бясконца шмат.
