Дабравешчанне Прасвятой Багародзіцы святкуюць праваслаўныя вернікі

Праваслаўныя вернікі сёння адзначаюць адно з вялікіх святаў - Дабравешчанне Прасвятой Багародзіцы, піша БЕЛТА.

Гэтае свята ўстаноўлена ў памяць аб дні, калі Дзеве Марыі з'явіўся пасланы Богам Архангел Гаўрыіл і ўзвясціў: "Не бойся, Марыя, бо ты здабыла ласку Боскую. Ты народзіш Сына і даш яму імя Ісус. Ён будзе вялікі і назавецца Сынам Усявышняга, і Царству яго не будзе канца". Лічыцца, што менавіта ў гэты дзень на Марыю сышоў Дух Святы і яна зачала Боганемаўля Ісуса.

Дабравешчанне штогод адзначаецца 7 красавіка (па новым стылі), роўна за дзевяць месяцаў да Раства Хрыстовага, якое прыпадае на 7 студзеня. З даўніх пор свята з'яўляецца адным з найважнейшых у праваслаўі. На Русі верылі, што ў гэты дзень нават грэшнікаў не мучаць у пекле. Выконваць якую-небудзь работу строга забаранялася.

Згодна з народнымі павер'ямі, Дабравешчанне абазначае прыход вясны, калі сам Гасподзь благаслаўляе зямлю на сеянне, урадлівасць, гэта значыць на дабрабыт чалавечы. Таксама згодна з павер'ем, якое надвор'е на Дабравешчанне - такім яно будзе і на Вялікдзень.