У Беларусі заснаваны Дзяржаўны знак якасці. Указ падпісаў Прэзідэнт Аляксандр Лукашэнка. У дакуменце разам з выявай замацавана і апісанне знака. Гэта чырвоны пяцівугольнік, у цэнтры якога размешчана перавернутая літара К і надпіс "Беларусь".
Якім быць беларускаму Знаку якасці, абмяркоўвалі на нарадзе ў Прэзідэнта 5 студзеня - у самым пачатку Года якасці. Пры распрацоўцы канцэпцыі за аснову быў узяты знак, які прысвойваўся ў часы Савецкага Саюза. Не адыходзіць ад нашай спадчыны - пазіцыя Прэзідэнта. Аляксандр Лукашэнка даручыў выканаць праект без празмернасцяў, каб ні колеравая гама, ні малюнкі не перагружалі сімвал.
Пяць вуглоў сімвалізуюць спалучэнне пяці паказчыкаў вытворчасці, дзякуючы якім і дасягаецца якасць беларускай прадукцыі: бяспека, экалагічнасць, інавацыйнасць, тэхналагічнасць і эстэтычнасць.
Парадак прысваення Дзяржаўнага знака якасці і пералік стымулюючых ільгот і прэферэнцый, якія даюцца вытворцам пры яго прысваенні, будуць вызначаны ўрадам.
Алена Маргунова, першы намеснік старшыні Дзяржаўнага камітэта па стандартызацыі Беларусі:
Распрацаваны даволі сур'ёзны механізм, які будзе рэалізоўвацца на працягу года. Прадпрыемства, якое гатова выставіць сваю прадукцыю на атрыманне Знака якасці, павінна прайсці некалькі этапаў. Прадукцыя павінна адпавядаць якасці сусветных аналагаў альбо пераўзыходзіць іх па гэтым паказчыку.
Знак якасці будуць выдаваць на два гады, пры гэтым кантраляваць, як падтрымліваецца высокі ўзровень прадукцыі. Плануецца, што першыя ўладальнікі знака з'явяцца ў Беларусі ўжо да канца года.
