Аляксандр Кныровіч прыгавораны да 6 гадоў пазбаўлення волі з адбываннем пакарання ў калоніі ўзмоцненага рэжыму. Ён прызнаны вінаватым у дачы хабару і дачы хабару паўторна, ухіленні ад выплаты падаткаў.
Нагадаем, дырэктар "Сармат-Тэрма-Інжынірынг" і чацвёра яго калег былі затрыманы ў студзені 2017 года. Паводле версіі следства, Аляксандр Кныровіч з 2008 па 2016 год даваў распараджэнні аб ухіленні ад выплаты падаткаў шляхам прыніжэння падатковай базы кампаніі. Дзеянні вяліся праз расійскую кампанію "СТІ-Трэйдынг". Сума падатковых прэтэнзій перавысіла 3 мільёны рублёў. Таксама ў 2016 і студзені 2017 года Кныровіч даваў распараджэнні супрацоўнікам аб дачы хабараў службовым асобам за спрыяльнае вырашэнне пытанняў пры правядзенні біржавых таргоў.
Аксана Дудко, дзяржаўны абвінаваўца:
"Астатнія абвінавачаныя прыгавораны да тэрмінаў пазбаўлення волі ад 3 да 4 гадоў з адбываннем пакарання ў калоніі ўзмоцненага рэжыму. Бокам абвінавачання было прапанавана прызначыць аналагічныя тэрміны".
Раней ужо былі асуджаны двое інжынераў "Брэстжылбуда". Іх прызналі вінаватымі ў атрыманні хабараў ад прадстаўнікоў фірмы "Сармат-Тэрма-Інжынірынг" на суму каля 10 тысяч рублёў. Вынік - 4 і 3 гады зняволення. Яшчэ аднаго сузаснавальніка і былога дырэктара "Сармат-Тэрма-Інжынірынг" Уладзіміра Дашкевіча будуць судзіць асобна з-за праблем са здароўем.
