Сёння 110 дэпутатаў Палаты прадстаўнікоў Нацыянальнага сходу Беларусі восьмага склікання збяруцца на сваё першае пасяджэнне. Наперадзе 5 гадоў працы і ў акругах, і на міжнародных пляцоўках, і ў абнаўленні прававой базы.
Вялікая работа праведзена і папярэднім скліканнем у частцы дапрацоўкі законаў згодна з нормамі абноўленай Канстытуцыі. І гэта важна замацаваць і прымножыць. Ініцыятыўнасць і прафесіяналізм - гэтыя якасці заўсёды будуць у цане.
Святлана Лук’янюк расказала пра старт новай работы. Авальная зала Дома ўрада ў чаканні дэпутатаў восьмага склікання. На 5 гадоў гэта іх рабочае месца. Самае галоўнае і важнае, бо тут якраз будуць галасаваць па законапраектах, па якіх пасля жыць усім нам.
Месцы па зале размяркоўваюць па тэрытарыяльным прынцыпе. Напрыклад, Брэст, Віцебск і далей па алфавіце. Замыкае Мінск. Галоўная, вядома, трыбуна для спікера і віцэ-спікера. У кожнага парламентарыя будзе свая імянная карта, і пасля таго як ён загрузіць яе ў сістэму на сваім рабочым месцы, можна пачынаць галасаваць націскам на кнопкі за або супраць і выказваць сваё меркаванне наконт таго ці іншага дакумента. А калі не прагаласаваў, значыць устрымаўся.
Тут і ўбудаваныя планшэты, на якіх можна паглядзець дакументы, законапраекты, і не трэба іх раздрукоўваць. Усе гэтыя дэталі, упэўнены, дэпутаты новага, восьмага склікання асвояць хутка. Першая сесія стартуе 22 сакавіка а 10-й гадзіне раніцы. 110 дэпутатаў, з іх 20 перавыбраліся з папярэдняга склікання. Пераемнасць захоўваецца, як і жаночы погляд на законы. 37 прадстаўніц прыгожага полу (а гэта траціна ад усяго складу) будуць займацца заканадаўствам. Больш за ўсё месцаў у Палаце прадстаўнікоў атрымала партыя "Белая Русь". Ад яе прайшоў 51 дэпутат. Ад Камуністычнай - 7 чалавек, ад Рэспубліканскай партыі працы і справядлівасці - 8, ад Ліберальна-дэмакратычнай - 4.
Палата прадстаўнікоў, згодна з новай рэдакцыяй Канстытуцыі, - гэта касцяк для фарміравання Усебеларускага народнага сходу. Усе дэпутаты стануць яго дэлегатамі, так што наперадзе вялікая работа.
Пачынаецца новы этап гісторыі Палаты прадстаўнікоў восьмага склікання. Сёння мы даведаемся, хто стане спікерам і яго намеснікам. Будзе абмеркаванне кандыдатур і таемнае галасаванне.
А ўжо на наступным тыдні дэпутаты вызначаецца, хто ў якой камісіі будзе працаваць (іх 14): ад міжнароднай і эканамічнай палітыкі да сацыяльнай і па дзяржбудаўніцтве.
