У Добрушы 29-ты Дзень беларускай пісьменнасці сабраў тысячы людзей з усіх куткоў Беларусі і блізкага замежжа. Унікальныя пляцоўкі, прэзентацыі кніг, канцэрты, літаратурныя прэміі - на два дні горад стаў сапраўдным цэнтрам беларускай культуры. Святочная праграма максімальна насычаная, застацца абыякавым немагчыма. Не абышлося і без сюрпрызаў. Падрабязнасці ў Мікалая Скінціяна.
Музыка, літаратура, гісторыя, навука, культура, спорт - усё гэта спалучылася, каб паказаць: у беларусаў багатая спадчына, якой трэба ганарыцца. На вуліцы князя Паскевіча - дзясяткі інтэрактыўных зон, сярод якіх цэлы горад рамеснікаў.
Канцэпцыя фестывалю - літаратурная спадчына і гістарычная памяць. Навуковая канферэнцыя "Добрушскія чытанні" сабрала тых, для каго культура - сэнс жыцця.
Алена Васілевіч, загадчыца аддзела Інстытута літаратуразнаўства імя Янкі Купалы:
Такога кшталту канферэнцыі садзейнічаюць узнікненню цікаўнасці, паглыбленню цікаўнасці да літаратуры, нацыянальнай культуры ўвогуле. І, канешне, роля такіх канферэнцый узрастае з кожнай праведзенай канферэнцыяй.
Прэзентацыі кніг - візітная картка фестывалю
Ад мінулага беларускай літаратуры да яе сучаснасці. Прэзентацыі кніг - візітная картка фестывалю. Гэта не толькі мастацкая альбо навуковая літаратура, але і злабадзённая публіцыстыка, якая адлюстроўвае самыя вострыя грамадскія пытанні.
Гераізм народа - аснова гістарычнай памяці
Гераізм беларускага народа ў гады Вялікай Айчыннай - аснова нашай гістарычнай памяці. У гонар тых, хто падарыў нам мір - ускладанне кветак і вянкоў. Але каб максімальна акунуцца ў атмасферу ваеннага ліхалецця, патрэбныя сапраўды яскравыя эмоцыі.
Больш за сто чалавек, амаль два дзясяткі адзінак рэтратэхнікі. Гомельскія рэканструктары падрыхтавалі маштабнае дзейства - эпізод партызанскай аперацыі 1943 года.
Пра партызанскі рух на Гомельшчыне ў гады вайны ходзяць легенды. Рэканструкцыя на набярэжнай Іпуці - спроба перадаць, якой цаной народ атрымаў вялікую Перамогу.
Адна з цэнтральных фігур свята - народны пісьменнік Іван Шамякін. Напэўна, няма беларуса, які не чытаў хаця б адзін яго твор. Сваім талентам пісьменнік праславіў не толькі Беларусь, але і сваю малую радзіму - Добрушскі край. Адкрыццё помніка Шамякіну ў цэнтры горада - падзяка ад нашчадкаў за непаўторную спадчыну.
Уручэнне Нацыянальнай літаратурнай прэміі
Кульмінацыя першага дня фестывалю - уручэнне Нацыянальнай літаратурнай прэміі. У сямі намінацыях прадстаўлены амаль 60 твораў. Размах - ад дзіцячых кніг да навуковых. Для кагосьці гэта добрая магчымасць заявіць пра сябе, вопытным літаратарам прэмія надае ўпэўненасць - яны на правільным шляху.
Першы дзень фестывалю беларускага пісьменства ў Добрушы наведалі тысячы чалавек. Гасцей другога дня таксама чакаюць шмат сюрпрызаў. Сярод іх футбольны фестываль, свята духавых аркестраў і ўзнагароджанне таленавітай моладзі.