Да Дзеда Мароза ў Белавежскую пушчу прыязджаюць да 100 000 чалавек за сезон

Зімовыя святы - час прымаць гасцей. І час хадзіць і нават ездзіць у госці да бацькоў, да сваякоў, да калег, ды проста да знаёмых. Бо ўзімку любы чалавек, здаецца, мае асаблівую патрэбу ў рэсурсе, які хутчэй за іншыя вычэрпваецца ў нашу высокатэхналагічную эпоху. Чалавеку айцішнаму, як нікому іншаму, патрэбна цеплыня простых чалавечых зносін!

Часам здаецца, што падарыць людзям магчымасць проста сесці адно побач з адным і пагаварыць не паспехам, не аб працы і не праз экран гаджэта можа толькі турпаездка ў далёкую краіну або... цуд. Але вось зусім побач, у нас у Беларусі, ёсць шанц сумясціць! Едзьце да Дзеда Мароза ў Белавежскую пушчу, як гэта робяць да 100 000 чалавек за сезон.

Раскоша жывых зносін дарослых і іх дзяцей, занятых на важнай працы людзей і іх блізкіх, самых старых і самых маленькіх - гэта выдатны навагодні падарунак, сюжэт пра які нам дорыць Марыя Тройніч.

У Белавежскай пушчы чараўніцтва пачынаецца яшчэ па дарозе да маёнтка Дзеда Мароза: першымі гасцей сустракаюць дзікія алені. А сама навагодняя казка хаваецца за вялікай разьбянай брамай.

Чым бліжэй да Новага года, тым больш насычаны графік Дзеда Мароза. Першыя экскурсіі ў маёнтак пачынаюцца ў дзевяць раніцы. Пяцьдзясят карагодаў запар вакол ёлкі - і гэта яшчэ не максімум. Але чароўны стары не скардзіцца: гаворыць, энергіі яму надаюць эмоцыі наведвальнікаў. У перапынку ён сядзе ў крэсла ля каміна і раскладзе лісты. У папяровых канвертах - самыя запаветныя мары дзяцей і дарослых. Ганконг, Пітсбург, Сант'яга: беларускага Дзеда Мароза ведаюць на ўсіх кантынентах.

Толькі гэтай зімой Дзеду Марозу даслалі сямнаццаць тысяч лістоў. І ні адзін не застаецца без увагі. Ліставання так шмат, што ў маёнтак вырашылі ўсталяваць вялізную паштовую скрыню памерам з невялікую хатку. У ёй электронны датчык "цудаметр" - так назвалі спецыяльны прыбор, які вымярае сілу навагодніх жаданняў. Адказваць на пасланні казачнаму старому дапамагаюць памочнікі і ўнучка Снягурка.

Просьбы Дзеду Марозу паступаюць і па электроннай пошце. Форму можна запоўніць на сайце Нацыянальнага парка "Белавежская пушча". Праўда, пакуль віртуальная форма зваротаў не такая папулярная: за дзень прыходзіць каля дзесяці такіх пасланняў. У асноўным па інтэрнэце пішуць дарослыя. Яны, як і дзеці, вераць у цуд. Але толькі жаданні іншыя. Тыя, каму за васямнаццаць, просяць Дзеда Мароза паспяхова здаць дзяржэкзамены, урэгуляваць судовыя спрэчкі або знайсці жаніха. 

Сярод адрасантаў нямала тых, хто любіць дарыць падарункі не менш, чым атрымліваць. Часта ў пушчу прыходзяць цэлыя пасылкі з сувенірамі ручной работы.

Нягледзячы на шчыльны графік, Дзед Мароз адказвае на шматлікія лісты асабіста. У гонар свята ў якасці выключэння адно пасланне даручылі прачытаць нашай здымачнай групе. Даведвацца пра чужыя жаданні аказалася вельмі хвалююча. Вось піша хлопчык Арсеній з Гродзенскага раёна. У яго лісце - усё зразумела без лішніх слоў: малюнак скейта. 

Часу на адпачынак за чытаннем крыху: на ганку ўжо чакаюць тыя, хто прыехаў сказаць пра свае жаданні чараўніку асабіста. Каб выканаліся напэўна.

За адзін дзень у рэзідэнцыі прымаюць каля сямі тысяч гасцей. Акрамя сустрэчы з чараўніком і падарункаў, наведвальнікаў чакае мноства атракцыёнаў. Адзін з іх хатка Снягуркі з чароўным люстэркам. Паводле легенды, жанчыны, якія паглядзяць у яго праз акно, стануць прыгажэйшымі і маладзейшымі. 

Пабываць у гасцях у казкі - адно з навагодніх жаданняў другакласніцы Дашы Касьянавай. Дзяўчынка жыве ў Віцебску, але адлегласць шэсцьсот кіламетраў яе не палохае. Яна верыць: калі не ў гэтым, дык у наступным годзе абавязкова прыедзе ў госці да Дзеда Мароза і ўбачыць старажытную пушчу. А пакуль яна старанна выводзіць літары. Напісаць ліст чараўніку - задача больш сур'ёзная за хатняе заданне і нават кантрольную. Школьніца просіць шмат снегу, канструктар і спартыўных перамог. Даша займаецца барацьбой, і ў яе ўжо ёсць першы дзіцячы разрад.

Пярэдадзень Новага года - час, калі вера ў цуд аб'ядноўвае мільёны жыхароў розных кантынентаў і ўзростаў. З тымі, каму ў надыходзячым годзе вельмі трэба выкананне жадання, Дзед Мароз падзяліўся сакрэтам свайго чараўніцтва.

Самае галоўнае - верыць, як гэта ўмеюць рабіць самыя маленькія і самыя адданыя сябры Дзеда Мароза і Снягуркі.