Масленіца - добрая магчымасць адпачыць і паласавацца стравамі беларускай кухні і, вядома, блінамі. Сёння праводзілі зіму адразу на некалькіх сталічных пляцоўках. Асноўнай стала плошча каля Палацу спорту. Але Батанічны сад і Палац дзяцей і моладзі таксама падрыхтавалі святочную праграму.
Надзея Сербіненка далучылася да гулянняў. Сёння з самай раніцы ў Палацы дзяцей і моладзі пануе святочная мітусня. Хтосьці рыхтуе сваю асабістую экспазіцыю, хтосьці распяваецца, а хтосьці рыхтуецца да выступлення на сцэне. Усіх яднае масленічны настрой.
Вольга да сустрэчы вясны падрыхтавалася загадзя і грунтоўна. За некалькі тыдняў стварыла цэлую клумбу з салодкіх кветак. Замест бутонаў - цукеркі ў гафрыраванай паперы. Выраб адной кветкі ў майстра займае пятнаццаць хвілін.
Скамарохі і цыганы выйшлі на пляцоўку каля палаца і цешылі народ беларускімі песнямі і запальнымі танцамі. Асабліва спадабалася Масленіца самым маленькім гледачам.
А тым часам у холе палаца навучэнцы гурткоў робяць чучалы. У кожнай каманды свая тэхналогія выканання і асаблівы стыль. Галоўнае патрабаванне - каб матэрыял добра гарэў і быў натуральны. Дрэва, салома, тканіна і папера падыходзяць ідэальна.
Батанічны сад таксама па-свойму праводзіў зіму. Сапраўдныя каруселі сталі сюрпрызам для мінчан. Такія механізмы запускаюць толькі ў канцы вясны. Але для масленічнага свята яны пачалі працаваць першага сакавіка.
У Батанічным садзе быў створаны сапраўдны свет дзяцінства. Нацешыцца апошнім снегам яны змаглі толькі тут.
