У Маскве адкрылася выстава, прысвечаная 50-годдзю ансамбля "Песняры"

Аматарскія фатаграфіі, рэдкія пласцінкі, канцэртныя афішы. У Маскве на ВДНГ адкрылася выстава "Песнярам 50". Усе матэрыялы пададзеныя прыхільнікамі і фан-клубамі легендарнага калектыву, які стаў адным з музычных сімвалаў савецкай эпохі. На выставе можна прасачыць усю гісторыю ансамбля пад кіраўніцтвам Мулявіна ад першай назвы "Лявоны", якая праіснавала ўсяго год, да "Песняроў", якія ў 70-80-я былі вельмі папулярныя ў СССР, убачыць першы вінілавы альбом 1971 года, экспартныя варыянты фірмы "Мелодыя", афішы, якія фанаты групы здымалі проста з канцэртных тумбаў, а таксама сяброўскі шарж на "Песняроў", намаляваны вядомымі беларускімі мастакамі Цэслерам і Войчанкам.

На выставе паказаныя і некалькі мала вядомых альбомаў. Такія як "Праз усю вайну", дзе пад музыку Мулявіна "Песняры" выконвалі песні на вершы паэтаў-франтавікоў, і альбом у гонар Алімпіяды-80 у Маскве, дзе ансамбль быў ганаровым госцем культурнай праграмы спартыўнага першынства.