На пляцоўках Нацыянальнага цэнтра сучасных мастацтваў - экспазіцыі, прысвечаныя каханню. На сцэне Белдзяржфілармоніі - джазавы вечар. Плануем культурныя выхадныя з рубрыкай "Праменад" і Ларысай Гулякевіч.
Узаемаадносіны паміж мужчынамі і жанчынамі. Тэма адвечная, каб менш было спрэчак, лепш сваё разуменне на гэты конт выказваць і адлюстроўваць у мастацтве. Мастак з Паўночнай сталіцы дэманструе персанальны праект жывапісу і графікі «З Пецярбурга з любоўю».
7 жывапісных палотнаў і 11 графічных лістоў, аб'яднаных тэмай кахання, адносін, вясны і чаканняў. У іх наяўнасць алегарычнасці, шматсюжэтнасці і неад'емная піцерская мастацкая школа. Ва ўсіх яе работах - цікавасць да ўзаемаадносін паміж мужчынам і жанчынай. «З Пецярбурга з любоўю» - не першы праект Анастасіі Полазавай, яна неаднаразова ўдзельнічала ў міжнародных пленэрах на беларускіх землях. Аднак гэта першая персанальная выстава ў Нацыянальным цэнтры сучасных мастацтваў (пляцоўка - Някрасава, 3).
«Тычынкі і песцікі» - таксама тэма абодвух полаў. Экспазіцыя з такой вясновай назвай адкрылася на праспекце Незалежнасці. Мастачка Ганна Сілівончык - вядомы майстар любоўнай тэматыкі - дэманструе жывапісныя палотны і арт-аб'екты. Вясна ж пачалася.
Жывапіснае цвіценне - вясновае буянства. У мастачкі Ганны Сілівончык расліны зусім не падобныя на прадстаўнікоў звычайнай флоры. Тут і насякомаедная кветачка ў вобразе чаравічка і людзі-сонечнікі, якія пры дапамозе розных механізмаў паварочваюцца да сонца. Але ўсё ж у жанры законаў прыроды. Ганна вельмі тонка ўлавіла і па-свойму паказала сувязь жывёльнага і расліннага свету.
Работы напоўнены колерам, святлом і чуллівым рамантызмам душэўных перажыванняў. Вясновае ўзбуджэнне прыроды прымушае ўсё жывое да метафізічнага падарожжа ў пошуках страчанага раю на зямлі. Галоўны крытык Ганны - яе муж, таксама мастак Васіль Пешкун.
Выстава будзе доўжыцца да сярэдзіны красавіка на другой пляцоўцы Цэнтра сучасных мастацтваў (праспект Незалежнасці, 47).
Белдзяржфілармонія ў нядзелю запрашае на джазавы вечар. Упершыню вакалістка з Польшчы Ага Зарыян, уладальніца харызматычнага голасу, выйдзе на мінскую сцэну з музыкантамі EUROPEN JAZZ TRIO.
Першае сусветнае прызнанне спявачка набыла дзякуючы свайму ўнікальнаму вакальнаму стылю з характэрнай лёгкасцю фразіроўкі і цёпламу тэмбру голасу. Ага Зарыян - уладальніца шматлікіх узнагарод і прэмій у музычным свеце. Неаднаразова ёй надаваўся тытул «Джазавая вакалістка года» ў рэйтынгу часопіса Jazz Forum. Польская джаз-дзіва пакарыла сэрцы прыхільнікаў ва ўсім свеце, выступаючы з канцэртамі ў Вялікабрытаніі, ЗША, Бельгіі, Ізраілі, Францыі, Швецыі, Расіі, Японіі, Кітаі і іншых краінах свету. У Мінску прагучаць найлепшыя кампазіцыі з васьмі альбомаў спявачкі.
27 сакавіка - Міжнародны дзень тэатра. Адзначыць яго можна ў нядзелю за горадам у Музеі народнай архітэктуры і побыту. Нясумных выхадных і да наступнай пятніцы.
