Лепшыя аўтары "Восеньскага салона" на біс у другой зале Палаца мастацтва. А ў афішы філармоніі - канцэрт "па шматлікіх заяўках". Якая сталічная бібліятэка акунулася ў авангард? І што за сукенкі "сушацца" над сцэнай Вялікага? Запрашаем на "Праменад".
Мы зноў у Вялікім - кожны сезон нібыта святочны. Што ні выхадныя, то прэм'еры. Ці замежныя тэмбры ў партыях, ці новыя праграмы ў камернай зале. У суботу на галоўнай сцэне зноў будуць разгадваць "тайну трох карт" ад "Пікавай дамы". Ролю Германа іграць будзе саліст Міхайлаўскага тэатра Міхаіл Пірагоў.
Аповесць - сачыненне Пушкіна. Музыка Чайкоўскага. Іх містычная гульня ў карты доўжыцца тры з паловай гадзіны! Беларускія эстэты слухаюць з 2014-га. Партытуры ажывіць гэтым разам Арцём Макараў. З нядаўняга часу - галоўны дырыжор беларускага Вялікага, пераехаў з Башкірскага тэатра. А Пірагоў ужо спяваў у нас ролю Германа. Гэты прыезд для ўладальніка "Залатой маскі" - трэці.
І што пачуем тут у нядзелю? Пакуль на вялікай сцэне будзе залівацца сонцам "дон кіхотаўская" Барселона, са сцэны маленькай - нібы з савецкага радыёпрыёмніка - уключаць "песні вялікай краіны".
Такая настальгія праз песні. Але ніякіх пласцінак! Ці чулі вы вальс з кінакамедыі "Сцеражыся аўтамабіля" або марш з "Вяселых рабят" у выкананні дзвюх скрыпак, альта, віяланчэлі і кантрабаса? Струнны квінтэт "Серанада" агучаць знакамітыя мелодыі. На біс у гэты вечар - "Ландышы", "Смуглянка" і "Пяшчота". Усё гэта - тэмбрамі сапрана і тэнара.
Білет можна заказаць зараз, а вось на "Ілюзіі любві" Ігара Колба першую прэм'еру сезона пакуль глядзім праз падол сукенак! Гэта эксклюзіўныя кадры. Учора галоўны балетмайстар "прымераў" дэкарацыі да сцэны. Здаецца, "Ілюзіі" Колба зноў канцэптуальна прадуманыя. Так ён раздумвае пра каханне дзявочымі вачыма.
Затое ўсё відавочна - у "Музычнай восені", якая не спыняецца ў Белдзяржфілармоніі. 49-я па ліку. Гэта самы неўміручы фестываль краіны. Аб'ядноўваюць у адной афішы 27 канцэртаў. Да канца лістапада фестываль дэкламуе класіку.
Напрыклад, заўтра - вечар для прыхільнікаў джаза. У Беларусі - адзін са знакамітых саксафаністаў Кубы, а ў нядзелю афра-кубінскія рытмы рэфармаціруюцца ў павольныя шэдэўры Арно Бабаджаняна.
Прэм'ера і ў афішы карціннай. Новая выстава - у бібліятэцы імя Пушкіна. Арт-праект аб'яднаў на сценах трох мастакоў. Акулаў, Ржэўскі, Песін. У іх сачыненнях - сюррэалізм у дуэце з фальклорам. Ёсць намёкі на Далі.
Сачыць за рэпетыцыямі прэм’ер і анонсамі экспазіцый вы можаце кожную раніцу на тэлеканале "Беларусь 1". Больш культурных явак і арт-пароляў - на сайце Белтэлерадыёкампаніі.
