Культурныя падзеі Мінска - у рубрыцы "Праменад"

Міжнародны кінаагляд "Лістапад" у гэтым сезоне ўжо сабраў рэкордную колькасць заявак і працягвае пошук новых імёнаў у сінема-індустрыі. У дырэкцыю форуму свае прапановы накіравалі кінематаграфісты з 55 краін. Векавы юбілей сустрэла Нацыянальная бібліятэка Беларусі. У фондах інфармацыйнага і сацыякультурнага цэнтра краіны беражліва захоўваюць больш за 10 мільёнаў экзэмпляраў кніг. На вахту 85-га музычнага сезона заступіла Белдзяржфілармонія. Якіх рэпертуарных па чакаць ад флагмана музычнага жыцця сталіцы, дзе паглядзець на раскадроўку Мінска і да якіх эксперыментальных фарматаў звяртаецца Цэнтр сучасных мастацтваў? Адказы ў рубрыцы "Праменад".

Графічны летапіс Мінска ў Нацыянальным мастацкім музеі. Паэтычная сюіта ад Анатоля Тычыны ў малюнку і лінагравюры - візуалізацыя аблічча да і пасляваеннай беларускай сталіцы. Урбаністычныя ракурсы аўтара не проста сталі фігурантамі фондавых збораў, мастацкія дакументы нават перанеслі на паштоўкі, якія разышліся шматтысячнымі тыражамі.

Паўстагоддзя фіксаваў гарадскія ландшафты. Візітная серыя - савецкі Мінск. Сюжэтны маршрут праклаў па праспекце Незалежнасці: ад Галоўпаштамта да Палаца прафсаюзаў. Пісаў беларускі Версаль - Парк Паскевічаў. Праменад па Сожы, Піне і Дняпры лёг у серыю лінагравюр водны транспарт Беларусі. Мастацкі дыяпазон на графіцы не замкнуўся, быў пераканаўчы і як дызайнер камунаркі, майстар акварэлі, плакатыст.

Новая эстэтыка ад Нацыянальнага цэнтра сучасных мастацтваў. Арт-вынікі пленэрнай прэм'еры паспяхова дастаўлены на Някрасава, 3. Палотны з рэмаркай "Песняры зямлі беларускай" вярнуліся з гастрольнага турнэ Віцебск - Татарстан. Следам мастацкую лексіку, натхнёную юбілейным тандэмам Купалы і Коласа, ацэняць у Маскве.

Свае ракурсы Вязынкі, Мікалаеўшчыны, Смольні ў фармаце палатно-алей прэзентуюць аўтары Беларускага саюза мастакоў, інстытута Сурыкава і Рэпінкі. 22 аўтары ва ўнісон распавядаюць аб сюжэтах з жыцця і творчасці народных паэтаў. 16 дзён на натуры і баёпік у фарбах паспяхова перакладзены на холст.

Музычная восень афіцыйна ў Мінску. Філарманічны сезон адкрыў сімфанічны аркестр Беларусі. Сёння ў афішы - калабарацыя віртуозаў. Зала Шырмы ангажыруе галасы Вялікага тэатра. У рэпертуары музычнай гасцёўні оперныя бестселеры, пачуем і крыху рускай камерна-вакальнай лірыкі.

Праграма "Зоркі беларускай оперы на сцэне філармоніі" - даніна шаляпінскай традыцыі і сапраўдны камерны выклік для вакаліста. Мінімальная дыстанцыя з гледачом, не схаваешся тут і за персанажам спектакля. Вырашыць задачу з зорачкай узяліся вядучыя выканаўцы Вялікага ці трыо тэнар - сапрана - тэнар: Данусевіч, Прысяжнюк і Міхнюк. Голасам апошняга ў тэатры гучаць партыі Ленскага з "Яўгена Анегіна", Немарына з "Любоўнага напою", Лыкава з "Царскай нявесты". Калі фокус першага аддзялення на арыях, у другім інтанацыйныя націскі на рамансах.

Такім быў арт-дайджэст гэтага тыдня. Сачыце за навінамі ў рубрыцы "Праменад" кожную пятніцу і выбірайце свой культурны маршрут.