У альма-матар настаўнікаў і выкладчыкаў з гэтага часу ёсць і музычны сімвал. Гімн Беларускага дзяржаўнага педагагічнага ўніверсітэта сёння ўпершыню афіцыйна прагучаў у сценах ВНУ. З гэтай музычнай кампазіцыі, якую выканаў Нацыянальны акадэмічны хор імя Цітовіча, і пачаўся вялікі канцэрт, прысвечаны векавому юбілею педагагічнага. Гімн, як высветлілася, выбіралі на конкурснай аснове: журы праслухала амаль два дзясяткі кампазіцый. Сярод аўтараў - і самі педагогі, і аспіранты, і нават студэнты ўніверсітэта. Шматлікія з іх гэтым вечарам таксама выйдуць на сцэну роднай ВНУ.
Зараз у Беларускім дзяржаўным педагагічным універсітэце навучаюцца больш як 15 тысяч студэнтаў па 64 спецыяльнасцях. У ліку тых, хто цвёрда вырашыў атрымаць дыплом менавіта гэтай ВНУ, сёння і замежнікі - амаль 500 студэнтаў з 20 краін.
