На тыдні фан-сайты па ўсім свеце ўскалыхнулі публікацыі аб нашым нацыянальным адборы. Дыскусіі былі сапраўды гарачымі! Яшчэ б, бо ў праекце ўдзельнічаюць не толькі нашы, беларускія, але і замежныя музыканты з 16 краін!
Усяго ж на электронны адрас Белтэлерадыёкампаніі паступіла 116 заявак. І гэта, дарэчы, рэкорд нацыянальнага адбору за апошнія 7 гадоў. У панядзелак на Макаёнка, 9 адбылося праслухоўванне кандыдатаў, па выніках якога былі вызначаныя фіналісты. Яны ўжо ўзмоцнена рыхтуюцца да шоу, якое традыцыйна пройдзе ў фармаце тэлевізійнага канцэрта.
Да прыкладу, гэтай ноччу артысты і зусім не злажылі вока - здымаліся ў відэавізітоўках. На што яшчэ гатовыя пайсці артысты дзеля камандзіроўкі ў Тэль-Авіў? Музычны рэпартаж Іны Пілевіч.
Як і патрэбна зоркам, яны дазвалялі сабе капрызіць, эпаціраваць вонкавым выглядам і без сарамлівасці напрошвацца на карпаратывы.
Выканаць ужывую свае хіты ў Белтэлерадыёкампанію прыехалі больш як 9 дзясяткаў вакалістаў і калектываў. Хоць першапачаткова прэтэндэнтаў на ўдзел у "Еўрабачанні-2019" было больш - 116.
Нацыянальны адбор стаў інтэрнацыянальным. У гэтым сезоне прадставіць Беларусь на папулярным шоу падахвоціліся артысты з 16 краін. Асабліва актыўныя музыканты з Расіі, паступілі заяўкі і з ЗША, Канады, Партугаліі.
Ад хіта пра бульбу пад баян да лірычнай балады ад шведскага музыканта. Ацэньвала выступленні фокус-група. Гэта каманда прафесіяналаў, у складзе якой - кампазітары, аранжыроўшчыкі, педагогі па вакале, артысты, прадзюсары, шоумен.
Яны выбралі 10 фіналістаў. На вашых экранах - чарговасць іх выступленняў на выніковым гала-канцэрце. Яна была вызначаная шляхам жараб'ёўкі.
Самая юная фіналістка ледзь дарасла да дарослага "Еўрабачання", але ўжо заручылася падтрымкай аўтарытэтнага маскоўскага прадзюсара. 16-гадовая выхаванка Віктара Дробыша Зена абяцае прыйсці на шоу ў кампаніі аўтарытэтнага расійскага кампазітара.
Пасля аб'яўлення вынікаў - наўпрост да стыліста, заказваць убор пад песню. Алену Гарбачову для шоу апране Наталля Ляхавец. У дызайнера шыюць уборы зоркі не толькі беларускай, але і расійскай эстрады.
Самы экзатычны ўдзельнік адбору перад шоу не спявае, а ганяе мяч. 25-гадовы нігерыец Эмануэль Імагбе - спяваючы кардыёлаг і футбаліст. Студэнт Віцебскага медыцынскага ўніверсітэта пасля траплення ў фінал праекта ўжо стаў мясцовай знакамітасцю.
А вось ветэран адбору - беларуска NAPOLI рыхтавацца да шоу паляцела на Кіпр. Спявачка рэпеціруе сваё выступленне на марскім узбярэжжы.
Хто з 10 прэтэндэнтаў адправіцца ў маі на конкурс у Тэль-Авіў, вырашыцца па выніках жывога тэлевыступлення. Дарэчы, упершыню ў гісторыі нацыянальнага адбору падчас шоу журы будзе знаходзіцца на сцэне.
Падмосткі нацадбору змяняюць і форму - упершыню збудуюць подыум. Удзельнікі змогуць узаемадзейнічаць з танцпляцам. Новы падыход да трансляцыі дыктуе і новыя патрабаванні да ўдзельнікаў.
Вольга Саламаха, намеснік галоўнага дырэктара галоўнай дырэкцыі тэлеканала "Беларусь 1": "Мы ўпершыню папрасілі падрыхтаваць мульцітрэк. Праект песні. Цалкам гатовы праект дакументаў, які ўключае ў сябе запіс агульнага плана. Гэта дапаможа і нашаму рэжысёру".
Фінал праекта пройдзе не пазней за 8 сакавіка. Падрыхтоўка да яго ідзе практычна ад заходу да світання. Так мінулую ноч удзельнікі правялі на здымках прэзентацыйных ролікаў.
У відэавізітоўках фіналісты паўстануць зоркамі модных паказаў. Пры святле сафітаў па подыуме яны будуць ісці да сваёй мары - магчымасці выступіць на "Еўрабачанні" ў Тэль-Авіве. Ролікі ў стылі фэшн ацэнім у прамым эфіры перад выступленнямі канкурсантаў.
