Сям'я не толькі вырашыла перабрацца з абласнога цэнтра ў вёску, але і зрабіць гэта максімальна экалагічна. З натуральных матэрыялаў будуць сцены, аздабленне і мэбля.
Пра экабудоўлю раскажа Марыя Тройніч. Не хата, а вялікі загарадны катэдж: дом з саломы сям’я Ярашчук будуе сваімі сіламі. На будоўлю ў вёску Галіна і Андрэй прыязджаюць кожны дзень.
Як аказалася, ніякіх спецыяльных дазволаў на такую будоўлю не трэба. Па дакументах саламяны дом праходзіць як каркасны. Паводле слоў Галіны, спачатку знаёмыя жартавалі і параўноўвалі праект з казкай пра трох парасят. Але ў адрозненне ад казачнага - рэальны дом з саломы надзейны. Яго будуюць з драўлянага каркаса, у які ўкладаюць цяжкія блокі прасаванай саломы. Прасуюць іх на спецыяльным апараце. Яго рабілі па індывідуальным заказе на адным з заводаў.
Новы дом будзе аднапавярховы і чатырохпакаёвы. Мэбля і ўнутранае аздабленне - таксама з натуральных матэрыялаў.
Па падліках мужа і жонкі, новы катэдж ім абыдзецца па цане аднапакаёвай кватэры ў Брэсце. Але гэта - яшчэ не ўся эканомія. Таўшчыня саламянай сцяны - 40 сантыметраў. Яе цеплаправоднасць у тры разы ніжэй, чым у блокавай. Гэта значыць, што летам экадом будзе лепш захоўваць прахалоду, а зімой - цяпло. Пры гэтым сцены дыхаюць і вентыляцыю рабіць не трэба.
Матэрыялы для экалагічных дамоў у Брэсце ўжо пачалі выпускаць і ў прамысловых маштабах. На гэтым прыватным прадпрыемстве робяць абсталяванне для смеццеперапрацоўчых заводаў. Выкарыстаны пластык ператвараюць ў тратуарную плітку, люкі, чарапіцу і бардзюры.
Лініі для вытворчасці будаўнічых матэрыялаў са смецця пастаўляюць у дзесяць краін. Паводле слоў спецыялістаў, беларускія будаўнікі пакуль толькі пачынаюць асвойваць такія тэхналогіі.
Наваселле сям'я Ярашчук плануе адзначыць праз год. А побач хочуць пабудаваць яшчэ гасцявы домік - вадзіць па ім экскурсіі і праводзіць фестывалі. Каб натхніць і іншых на больш экалагічны лад жыцця.
