Ратавальнікі адпрацавалі небяспечныя сцэнарыі развіцця пажару ў будынках з вялікай колькасцю людзей

Найноўшая спецтэхніка, пад'ёмнікі, кубы жыцця і дзясяткі прафесіяналаў па рабоце ў надзвычайных сітуацыях. У Мінску на гэтым тыдні ратавальнікі адпрацавалі самыя небяспечныя сцэнарыі развіцця пажару ў будынках з вялікай колькасцю людзей.  Вучэнні праводзіліся на складаных аб'ектах - з вышыннага бізнес-цэнтра умоўных пацярпелых эвакуіравалі з дапамогай авіяцыі, а з будынка Мінскага цырка вызвалялі не толькі людзей, але і жывёл.  Пра тое, як прайшлі маштабныя трэніроўкі, раскажа Ілья Цвяткоў.

Верталёты ў небе і 12 машын спецтэхнікі - у самым цэнтры Мінска. Сёння тут праводзіць масавыя вучэнні сталічнае МНС. Адпрацоўваюць ліквідацыю ўзгарання ў вышынным будынку.  
Умоўнае ўзгаранне ліквідавалі ў адным з бізнес-цэнтраў - на 7-м і 14-м паверхах. З будынка эвакуіравалі работнікаў і наведвальнікаў. 
Паводле легенды, на верхніх паверхах былі пацярпелыя. Частку з іх вызвалілі пры дапамозе вышыннай тэхнікі, вельмі цяжкіх - на верталёце, прама  з даху будынка. 
На месцы вучэнняў быў арганізаваны  штаб па надзвычайных сітуацыях, а таксама мабільны медыцынскі пункт, дзе ўрачы  і валанцёры праводзілі агляд пацыентаў і аказвалі першую дапамогу.

Наступны этап - ліквідацыя задымлення ў будынку  Дзяржаўнага цырка. Складаны аб'ект з вялікай колькасцю людзей. За некалькі хвілін па вучэбнай трывозе на вуліцу трэба было вывесці ўвесь персанал. 

Супрацоўнікі цырка таксама адпрацавалі аператыўнасць і зладжанасць дзеянняў. Яны абавязаны былі дапамагчы жывёлам. Чатырохногіх вывелі на свежае паветра праз спецыяльныя выхады.

Далей трэба было справіцца з  умоўным узгараннем у манежы. Паводле легенды, у будынку знаходзілася некалькі пацярпелых. З апошніх  паверхаў іх вызвалялі з дапамогай "куба жыцця".

Падобныя вогненныя трэніроўкі – неабходная прэвентыўная мера, якая дазваляе адпрацаваць алгарытм дзеянняў і ратавальнікам, і супрацоўнікам розных арганізацый. Каб у выпадку рэальнай пагрозы не марудзіць і не губляць час. Кожная хвіліна можа каштаваць жыцця.