Сталіца мультфільмаў - Магілёў - запрашае на “Анімаёўку”, юбілей Брэсцкай дзіцячай мастацкай школы і выстава рамёстваў у Віцебску. Падрабязнасці ў нашым дайджэсце.
МАГІЛЁЎ
Дзевятнаццаты раз жыхары і госці Магілёва трапілі ў цудоўную краіну мультфільмаў. У абласным цэнтры праходзіць Міжнародны фестываль анімацыйных фільмаў “Анімаёўка”. На працягу некалькіх дзён мультфільмы з 45-ці краін свету паказваюць у кінатэатрах горада і вобласці. У конкурснай праграме заяўлены 103 фільмы з 34-х краін. Упершыню свае работы дэманструюць аніматары з Венесуэлы, Кіпра, Македоніі, Фінляндыі, Харватыі. Сёлетні фестываль анімацыйных фільмаў стаў самым прадстаўнічым за ўсю гісторыю па колькасці краін-удзельнікаў. Імёны пераможцаў назавуць ужо заўтра на ўрачыстым закрыцці фестывалю.
БРЭСТ
40-гадовы юбілей адзначыла Брэсцкая дзіцячая мастацкая школа. Створаная чатыры дзесяцігоддзі таму на энтузіязме неабыякавых да мастацтва людзей, за сваю біяграфію ўстанова выпусціла больш за 2 тысячы мастакоў. І сёння азы малюнка, жывапісу, графікі тут спасцігаюць больш за паўтысячы вучняў. У школе некалькі напрамкаў і студый. У 2015 годзе ўстанове было прысвоена імя першага дырэктара, вядомага брэсцкага мастака Аляксандра Алонцава.
ВІЦЕБСК
Разьба па дрэве, вязанне, пэчварк, маляваныя дываны, вырабы з саломкі і гліны. У Віцебску ўпершыню ладзіцца выстава-конкурс пад назвай "Ад майстра да вучня". Удзел у праекце, накіраваным на захаванне традыцыйнай беларускай культуры, прымаюць 15 дамоў рамёстваў з усёй вобласці. Наведвальнікі экспазіцыі могуць пазнаёміцца з аўтарамі работ і ўзяць у іх урокі майстэрства. Уласныя калекцыі ўдзельнікаў і аўтарскія методыкі навучання творчасці ацэньвае прафесійнае журы. Вынікі і імёны пераможцаў конкурсу аб'явяць ў лістападзе.
