Сёння яшчэ і Дзень пісьменства, што не пазбаўлена пэўнага сімвалізму тыдня, які прайшоў пад знакам ведаў. Шчучын стаў 22-й сталіцай свята беларускага слова. Свае віншаванні гасцям і ўдзельнікам фестывалю накіраваў Прэзідэнт Аляксандр Лукашэнка.
Каранямі свята сыходзіць у 1994, калі першую нядзелю верасня афіцыйна зацвердзілі Днём беларускага пісьменства. Традыцыйна да гэтага моманту горад - сталіца свята - прыкметна змяняецца. У Шчучыне да Дня пісьменства пасля амаль гадавой рэканструкцыі адкрылі былы палац князёў Друцкіх-Любецкіх. Адрэстаўравалі бібліятэку імя Цёткі - пісьменніцы Элаізы Пашкевіч, а таксама раённы Дом культуры і гарадскую набярэжную. Сёлета на свята прыехалі каля 10 тысяч чалавек. І жыхары, і госці фестывалю пісьменства падкрэсліваюць унёсак Беларусі ў захаванне ўласных культурных традыцый, а таксама паважлівае стаўленне да дасягненняў іншых краін і народаў.
І яшчэ адна традыцыя Дня беларускага пісьменства сёння атрымала працяг - названы імёны пераможцаў Нацыянальнай літаратурнай прэміі Беларусі. Імі сталі 6 аўтараў. Усяго на конкурс было заяўлена 45 прац.
