Пачынаем праграму з сенсацыі. Сенсацыі года не толькі ў сусветным тэнісе. У тэнісе - ва ўсім спорце! Зборная Беларусі выходзіць у фінал Сусветнай групы Кубка Федэрацыі, чэмпіянату свету сярод нацыянальных каманд. І робіць гэта з першай спробы. Толькі ў канцы мінулага сезона нашы дзяўчаты выходзілі з другога па рангу дывізіёна, а ўжо зараз могуць стаць лепшымі ў свеце. Звышдраматычнае супрацьстаянне з камандай Швейцарыі паказала, што ў нас расце вельмі таленавітае пакаленне тэнісістак, якое ўжо зараз вылучаецца нясхільным характарам у любых сітуацыях. Гэта прызнаюць усе суперніцы, зрынутыя сёлета беларускамі. Што гаворыць аб асаблівым стаўленні і павазе да нашай маладой каманды. З бліскучай перамогай нашых дзяўчат павіншаваў Прэзідэнт Беларусі.
Сімвалічна, што пераможны бал нашай зборнай прыносіць 18-гадовая Арына Сабаленка, якая ў прыгожым стылі абгульвае больш дасведчаную швейцарскую тэнісістку Вікторыю Голубіч. Некалькі дзён назад экс-першая ракетка свету Вікторыя Азаранка заявіла аб тым, што марыць згуляць у фінале, які адбудзецца як раз пасля таго, калі яна вернецца ў WTA пасля нараджэння сына. І мара Вікторыі стане рэальнасцю. Станіслаў Ліпскі аб гучным поспеху айчыннага тэніса.
Жаночая зборная Швейцарыі па тэнісе перад матчам значылася відавочным фаварытам у супрацьстаянні з Беларуссю, у складзе апанентак - экс-першая ракетка свету Марціна Хінгіс, 22-я ў сусветным рэйтынгу Тымеа Бачынскі, 54-я ракетка планеты Вікторыя Голубіч. Лепшая з беларусак сёння Аляксандра Сасновіч - 96-я.
Але Кубак Федэрацыі - камандны турнір, а спаборніцтвы, дзе спартсмен прадстаўляе сваю краіну, тым больш, выступаючы дома, сцірае перадматчавыя расклады!
На характары ў першы дзень паўфіналу Аляксандра Сасновіч абгульвае Вікторыю Голубіч 6:3, 5:7, 7:5, следам Арына Сабаленка, паказаўшы выдатны тэніс, прайграла Тымеа Бачынскі 4:6, 5:7.
1:1 пасля суботы - справядлівы вынік, тры гульні ў нядзелю чакалі балельшчыкаў "Чыжоўка-Арэны" і ўсёй краіны.
У бітве лідараў зборных: Сасновіч - Бачынскі 6:2, 7:6 - мацнейшая беларуска, Аляксандра на прэс-канферэнцыі заявіць: такога якаснага тэніса даўно не паказвала, Тымеа пасля пройгрышу заявіць:
Тымеа Бачынскі, 22-я ракета свету:
"Беларусь чакае шэраг паспяховых гадоў. Бо і мужчынская, і жаночая каманды дэманструюць выдатныя вынікі. Што датычыцца жаночай зборнай, то ў ёй шмат разнапланавых моцных гульцоў. Аляксандра Сасновіч выклікае толькі станоўчыя эмоцыі. Яна ціхая, спакойная, дабразычлівая. У апошнія месяцы яна дэманструе вельмі добрыя вынікі, так што, думаю, яна будзе станавіцца толькі лепшай".
Бацька і трэнер Аляксандры заяўляе: у Беларусі створаныя ўсе ўмовы для першых крокаў у гэтай гульні, далей прагрэс залежыць толькі ад індывідуальнасці спартсмена.
Так і здалося пасля першага сэта - 6:3, Арына не пакінула шанцаў Вікторыі Голубіч, але толькі здалася… Пройгрыш наступнага адрэзка 2:6 прымусіў задумацца, але ў гэты момант усе разумелі: даводзіць справу да парнай сустрэчы нельга, там Марціна Хінгіс згуляе, разумела гэта і Сабаленка…
Ледзь не прайграўшы сваю падачу пры ліку 4:4, 18-гадовая беларуска ўсё ж утрымлівае падачу і адразу ж робіць брэйк!
Вынік супрацьстаяння ЗША - Чэхія даведаемся за поўнач, а зараз аб сучаснасці - ніякай сенсацыі (скажа пасля матча старшыня Беларускай федэрацыі тэніса Аляксандр Шакуцін) у нашай вікторыі няма.
Пасля такіх перамог аб высокіх шанцах на трыумф у Кубку Федэрацыі гаварыць можна ўпэўнена. Да тытульнага супрацьстаяння ўжо выйдзе на корт Вікторыя Азаранка - гэта яшчэ больш узмоцніць каманду. Сёння ж экс-першая ракетка свету, як і ўвесь гэты тыдзень, была побач з дзяўчатамі, дапамагаючы парадай і сваімі эмоцыямі.
Малады беларускі спорт зрабіў яшчэ адну заяўку планетарнага маштабу, што ўжо зараз з нашай краінай трэба лічыцца. Тое, што яшчэ ўчора лічылася фантастыкай, сёння стала рэальнасцю.
