Рашэнне ніяк не назавеш нечаканым. Каб перайсці на новую бізнес-мадэль, ІП давалася паўтара года. Пры гэтым тэрміны неаднаразова пераносіліся.
Што ж, часу было дастаткова, вось толькі жаданне адмовіцца ад шэрых схем і гандляваць легальна ўзнікла далёка не ва ўсіх. У выніку частка прадпрымальнікаў зачыніла ралеты і падала заяву аб спыненні дзейнасці. Але шматлікія наадварот - знайшлі надзейных пастаўшчыкоў і працягваюць паспяхова весці бізнес. У якім, як вядома, пакуль хтосьці марудзіць, прыбытак атрымлівае іншы. У гэтым пераканалася Вольга Маслоўская, прагуляўшыся па магазінах і гандлёвых цэнтрах Віцебска.
У вялізным гандлёвым цэнтры Віцебска пакупнікоў нямнога. Большасць ралетаў зачынены, а спажыўцу патрэбен выбар. Прычына працяглага студзеньскага водпуску прадпрымальнікаў вядомая. Працаваць па новых правілах гатовыя не ўсе. Хоць часу паставіць бізнес на новыя - законныя - рэйкі было дастаткова, лічыць індывідуальны прадпрымальнік з Оршы Аляксандр Кішкуноў.
Аляксандр Кішкуноў у бізнесе 15 гадоў. Займаецца рэалізацыяй спартыўнага абутку. На каробках - знак адпаведнасці прадукцыі тэхнічнаму рэгламенту Мытнага саюза "Аб бяспецы прадукцыі лёгкай прамысловасці". Прасцей кажучы, гэта гарантыя якасці як для спажыўца, так і для самога прадпрымальніка.
За зачыненымі ралетамі адчыняюцца новыя магчымасці. Магчымасці выбару.
Купляць менш беларусы не сталі. І гэта не суб'ектыўныя адчуванні, а даныя статыстыкі. З рынкаў пакупнікі пайшлі ў магазіны, якія працуюць па правілах цывілізаванага гандлю.
Так, у сетцы магазінаў беларускага трыкатажу адзначаюць павелічэнне продажаў. Напрыклад, у трох гандлёвых пунктах, размешчаных у Віцебску, першая дэкада студзеня прыкметна плюсуе да студзеня мінулага года.
Асартымент, выбар мадэляў, сучасны дызайн, а галоўнае бяспека прадукцыі. Вось што важна для сучаснага спажыўца. Плаціць грошы за шэры імпарт сумніўнай якасці гатовыя нямногія.
Якасцю і выбарам тавараў на беларускіх прылаўках здзіўлены і госці краіны. Расіяне студзеньскія канікулы правялі ў Беларусі. Шмат гадзін і грошай выдаткавана на шопінг.
Галіна Шчарбакова, начальнік камерцыйнага аддзела ААТ "Віцебскі ўнівермаг": "Расійскія турысты, наведваючы наш горад, імкнуцца набыць тавары беларускай вытворчасці, яны зарэкамендавалі сябе на замежных рынках як якасныя тавары. І ўзровень выканання адпавядае сучасным кірункам моды. Першая дэкада склалася паспяхова для нашага ўнівермага. Рост рознічнага тавараабароту склаў 139 %. Па ўсіх прадпрыемствах Беллёгпрама ёсць рост тавараабароту як у натуральных адзінках, так і ў грашовым выражэнні".
Кансультанты гавораць, пакупнік прывык да камфортнага шопінгу. Сёння патрэбныя і прымерачныя, і слушная парада прадаўца, і памерны рад ад 40-га да 60-га. А яшчэ 100-працэнтная гарантыя вяртання грошай за няякасны тавар. Або якасны, але які проста перастаў падабацца.
Ірына Поснікава, намеснік дырэктара ЗАТ "Аршанскі дом гандлю": "Мы імкнёмся адпавядаць попыту пакупнікоў. Разглядаем пытанне аб пашырэнні. Мы супрацоўнічаем з усімі беларускімі пастаўшчыкамі тавараў лёгкай прамысловасці. Яны пашыраюць свой асартымент, і мы пашыраем свае заяўкі".
