Субота. У графіку і маршруце Прэзідэнта адзін з самых заходніх пунктаў Беларусі - Ваўкавыск. Менавіта тут рабочая гутарка аб праблемах і перспектывах Гродзеншчыны і працяг маштабнай інспекцыі ўсіх абласцей. У прыватнасці, на кантролі фінансы ААТ "Гродна Азот". Гігант трапіў у пастку энергатарыфаў і нявызначанасці па цэнах на газ. Да кастрычніка даручана вырашыць пытанне са шкляной галіной (наш хрустальны брэнд "Нёман") і вытворчасцю будаўнічых сумесяў (гэта Краснасельскі завод). У краіне зноў адчуваецца дэфіцыт цэменту. Але не з-за прастою, а з-за экспартнага прарыву. Занялі рынкі Польшчы і Калінінграда, але агалілі ўласны. Прыкра, што шэраг праблем, якія вынеслі на ўзровень Прэзідэнта, мог бы вырашыцца ў дыялогу губернатараў і ўрада. Але парадаксальна: дзве рукі аднаго ўладнага арганізма аказваецца працуюць самі па сабе, без каардынацыі. Лекі Аляксандр Лукашэнка прапанаваў радыкальныя.
Сітуацыю ў рэгіёне без глянцу Прэзідэнт праінспектаваў асабіста. Насуперак праграме візіту нечакана прыехаў на самае праблемнае прадпрыемства рэгіёна - Ваўкавыскі завод дахавых і будаўніча-аддзелачных машын. ДБАМ перажывае горшыя часы ў сваёй гісторыі. Галоўная надзея на турэцкага інвестара. Калі апошні зможа прывесці ў парадак фінансы і вытворчасць, яму гарантаваная падтрымка мясцовай улады і пяцігадовая перадышка па даўгах.
У цэлым Гродзенскі рэгіён застаецца флагманам у АПК і культуры земляробства. Тут 3/4 малака класа экстра, лепшае на постсавецкай прасторы дзіцячае харчаванне "БелЛакт" і новыя малочна-таварныя комплексы і свінагадоўчыя фермы. Як фарміруецца наш харчовы экспарт, Прэзідэнт паглядзеў на дзвюх фермах гаспадаркі "Хацькоўцы". Іх лідар, дарэчы, таксама выбраў раптоўна, прама падчас нарады. На падрыхтоўку гаспадару далі ўсяго гадзіну.
Абедзве фермы нават без падрыхтоўкі сур'ёзных нараканняў у Прэзідэнта не выклікалі. Гродзенцы паказалі, што гатовыя абараніць якасць і перад айчынным спажыўцом, і перад расійскімі партнёрамі. Дарэчы, менавіта на ўсход ідзе львіная доля экспарту.
І як раз на тыдні ўсходні партнёр быў прадстаўлены ў Мінску вялікай дэлегацыяй Бранскай вобласці. Нягледзячы на тое што часы ў рэгіянальнай эканоміцы зараз не лепшыя, нам па сілах актывізаваць супрацоўніцтва. Ну а як гэтага дамагчыся, абмяркоўвалі ў тым ліку і падчас сустрэчы Прэзідэнта і губернатара расійскага рэгіёна Аляксандра Багамаза. Менавіта на Браншчыне засяроджаныя самыя магутныя нашы машынабудаўнічыя зборкі - Гомсельмаша і "Амкадора". Не проста гандляваць, а працаваць над такімі сумеснымі праектамі, а таксама прасоўваць кааперацыю ў сельскай гаспадарцы, будаўніцтве і сферы біятэхналогій - вось на што арыентаваў Аляксандр Лукашэнка.
