Яшчэ адна сфера, дзе ў Беларусі вялікія планы, - гэта спорт. Наша краіна гатовая прымаць міжнародныя спаборніцтвы па лёгкай атлетыцы самага высокага ўзроўню: ад чэмпіянату Еўропы да чэмпіянату свету. Пра гэта ў пятніцу заявіў Кіраўнік дзяржавы на сустрэчы з прэзідэнтам Еўрапейскай лёгкаатлетычнай асацыяцыі Хансьёргам Вірцам. Аляксандр Лукашэнка падкрэсліў, што ў Беларусі моцная лёгкаатлетычная школа. Нашы спартсмены не раз станавіліся алімпійскімі чэмпіёнамі. У табліцы заваяваных узнагарод Беларусь займае 12 месца сярод больш чым 200 краін свету.
Аляксандр Лукашэнка, Прэзідэнт Рэспублікі Беларусь: "Дзякую за тую ўвагу, якую Вы надаеце нашай краіне. Гэта для нас вялікі стымул для развіцця лёгкай атлетыкі. Калі ў Вас будзе цікавасць да Беларусі ў сувязі з правядзеннем тут розных сустрэч, канферэнцый, міжнародных спаборніцтваў, Вы можаце заўсёды на нас разлічваць. Дзякуй Вам за падтрымку нашай федэрацыі, за ўдзел у падрыхтоўцы трэнераў, перадачу методык.
Мы нядаўна абралі новага старшыню Федэрацыі лёгкай атлетыкі. Гэта звязана з тым, што мы хочам надаць самую сур'ёзную ўвагу развіццю лёгкай атлетыкі ў нашай краіне. У нас вельмі добрыя традыцыі па развіцці розных лёгкаатлетычных відаў спорту. Я думаю, што мы адновім гэтыя школы, і Вы хутка пачуеце вельмі шмат добрага пра беларускіх атлетаў.
У Беларусі гатовыя стварыць усе неабходныя ўмовы для правядзення міжнародных лёгкаатлетычных спаборніцтваў самага высокага ўзроўню. Мы ўмеем гэта рабіць, і нядаўні чэмпіянат свету па хакеі гэта паказаў. Ён стаў лепшым у гісторыі чэмпіянатаў свету. Таму можаце разлічваць, што і лёгкаатлетычны форум, які тут, магчыма, адбудзецца, будзе лепшым у свеце".
Хансьёрг Вірц, Прэзідэнт Еўрапейскай лёгкаатлетычнай асацыяцыі: "Спадар Прэзідэнт, дазвольце павіншаваць Вас з выдатнымі вынікамі, якія дасягнулі беларускія атлеты ў Цюрыху. За некалькі праведзеных у Беларусі дзён меў магчымасць асабіста ўбачыць, чаго дасягнула ваша краіна ў справе стварэння спартыўнай інфраструктуры. Гатовы пагадзіцца з Вашымі словамі, што Беларусь можа прымаць у сябе спартыўныя мерапрыемствы сусветнага маштабу. Зараз мы ўжо лічым сваім абавязкам прыняць Вашу прапанову і скарыстацца Беларуссю для правядзення мерапрыемстваў".
