Аграпрамысловы комплекс Мінскай вобласці фарміруе магутныя рэсурсы для развіцця на найбліжэйшыя гады. Акцэнт зроблены на павелічэнне аб'ёмаў вытворчасці малака і яго глыбокай перапрацоўцы. Пра гэта сёння заявілі ў Капылі, дзе на базе мясцовага філіяла Слуцкага сыраробнага камбіната адкрылі цэх па вытворчасці сухога хуткарастваральнага малака. На мерапрыемстве з удзелам старшыні Мінаблвыканкама Аляксандра Турчына расказалі аб экспартным патэнцыяле гэтай прадукцыі - а гэта кандытарская сфера, кафэ. Дзякуючы рэалізацыі інвестпраекта ў Капылі з'явілася каля 40 новых працоўных месцаў. У планах Слуцкага сыраробнага камбіната - новы сырны цэх у Любані і вытворчасць смятаны ў Слуцку.
І сёння ж кіраўніцтва вобласці пабывала на новым малочна-таварным комплексе "Русакі", які адкрылі ў сельгаспрадпрыемстве "Старыца Агра". Усяго ж па выніках года ў Мінскай вобласці ўзвялі 30 новых аналагічных комплексаў. Адна з задач гэтых аб'ектаў - стварэнне аптымальных умоў працы для жывёлаводаў. А самі надоі малака павінны перавысіць 7 тыс. літраў за год на адну карову.