Прыватны капітал плюс інавацыйная вытворчасць, як вынік сотні новых рабочых месцаў. Такую формулу прымяніла шчучынскае прадпрыемства па перапрацоўцы малочнай сыроваткі. І вельмі паспяхова. У выніку за два гады завод ператварыўся ў найбуйнейшага экспарцёра краіны. Беларускі брэнд ужо вядомы ў 26-ці краінах свету, а найбуйнейшым спажыўцом тавара з'яўляецца Кітай. На падтрымцы такіх прадпрыемстваў акцэнтаваў увагу Прэзідэнт і падчас Штогадовага паслання беларускаму народу і парламенту. Стварэнне новых рабочых месцаў - прыярытэтная задача для ўсёй вертыкалі ўлады. Аб перспектывах інавацыйнага прадпрыемства - Юрый Карняловіч.
Яшчэ некалькі гадоў таму сыравіна для гэтага прадпрыемства лічылася прамысловымі адходамі малочных камбінатаў. У той час як на Захадзе сыроватку актыўна перапрацоўвалі і пастаўлялі ў тым ліку і ў нашу краіну. Сітуацыя змянілася, калі два гады таму ў Шчучыне з дапамогай прыватных інвестыцый з нуля ўзвялі сучасны завод.
Усе працэсы на гэтым прадпрыемстве цалкам аўтаматызаваныя. Вытворчасць сыроваткі адбываецца практычна без удзелу чалавека. Усе асноўныя паказчыкі выведзены на маніторы ў аператарскую. І ў выпадку ўзнікнення якой-небудзь пазаштатнай сітуацыі, яе можна лёгка выправіць пры дапамозе націску "мышкі".
У выніку атрымліваецца сухая сыроватка і вытворныя з яе канцэнтраты. Прадукты незаменныя ў любой харчовай прамысловасці. Працуе прадпрыемства кругласутачна, каб падтрымліваць такі рэжым, неабходныя высокакваліфікаваныя кадры.
Аб неабходнасці стварэння менавіта такіх высокапрадукцыйных рабочых месцаў гаварыў і Прэзідэнт краіны падчас Штогадовага паслання беларускаму народу і парламенту. Паводле слоў Кіраўніка дзяржавы, інавацыйныя вытворчасці атрымаюць шырокую падтрымку ва ўрадзе. А людзі - магчымасць не проста працаваць, а зарабляць грошы.
Працу на прадпрыемстве ў Шчучыне атрымалі не толькі жыхары суседніх раёнаў, а нават абласнога цэнтра. Усе высокакваліфікаваныя спецыялісты. Інжынер-тэхнолаг Ганна Зубель кожны дзень прыязджае на завод за 60 кіламетраў з Гродна. Аб сваім выбары не пашкадавала. Зарплата вышэйшая за сярэднюю па рэгіёне, ёсць перспектывы для кар'ернага росту.
Будаваўся завод у Шчучыне як імпартазамяшчальнае прадпрыемства, але за два гады ператварыўся ў найбуйнейшага ў краіне экспарцёра тавараў. У спісах паставак 26 краін. Сваім дасягненнем тут лічаць выхад на кітайскі рынак, дзе канкурыраваць прыходзіцца з найбуйнейшымі еўрапейскімі і амерыканскімі вытворцамі.
Прадпрыемству па перапрацоўцы малочнай сыроваткі ўсяго крыху больш за два гады, а яно ўжо знаходзіцца ў стадыі мадэрнізацыі. Гэта проста неабходна, каб утрымаць рынкі збыту. Сёлета тут плануюць асвоіць вытворчасць новых відаў прадукцыі, што дазволіць стварыць дадаткова дзясяткі высокапрадукцыйных рабочых месцаў.
Шчучынскае прадпрыемства па перапрацоўцы малочнай сыроваткі - найбуйнейшый экспарцёр краіны
23 апреля 2019