Сёння ў Мінску стартуе першы Форум рэгіёнаў Беларусі і Узбекістана

На працягу двух дзён удзельнікі абмяркуюць асноўныя кірункі супрацоўніцтва - ад адукацыі да прамысловасці. Які імпульс здольны даць форум развіццю эканамічных сувязяў дзвюх краін? Матэрыял Аляксандра Лучонка.

Мінск і Ташкент ужо не проста добрыя сябры - надзейныя партнёры. За пяць месяцаў гэтага года тавараабарот склаў каля 89 мільёнаў долараў. Але, як і ў любой справе, стаяць на месцы нельга. Адна з ключавых тэм гэтага форуму - кааперацыя менавіта на ўзроўні рэгіёнаў. 

З Узбекістана прыбыла вялікая дэлегацыя. Гэта парламентарыі, кіраўнікі міністэрстваў і прадпрыемстваў - больш за 120 гасцей. Дарэчы, шмат і прадстаўнікоў дзелавых колаў. 

На працягу двух дзён удзельнікі форуму абмяркуюць дзясяткі пытанняў. Размова пойдзе пра супрацоўніцтва ў адукацыі, у гуманітарнай, навуковай, аграрнай сферах. І асаблівая ўвага, вядома, прамысловасці.

Ва Узбекістане ўжо функцыянуе некалькі сумесных з Беларуссю прадпрыемстваў. Напрыклад, па зборцы пагрузчыкаў, экскаватараў. Наладжаны выпуск рэагентаў для харчовай прамысловасці і ветэрынарыі. Наогул, усе перспектыўныя праекты ўзаемнага супрацоўніцтва адлюстраваныя ў дарожнай карце. Форум, гавораць эксперты, надасць імпульс іх рэалізацыі. 

Андрэй Рыбак, старшыня пастаяннай камісіі Палаты прадстаўнікоў Нацыянальнага сходу Беларусі: "Ёсць дамоўленасці па стварэнні сумеснай вытворчасці ў сферы фармацэўтыкі. Гэты праект рухаецца. У сферы вытворчасці трактароў сёння ёсць дамоўленасці. Узаемадзейнічаюць нашы прадпрыемствы, такія як БелАЗ, МАЗ. Узбекістан валодае добрымі сыравіннымі рэсурсамі, у тым ліку і бавоўнай, якая вельмі цікавая для нашай лёгкай прамысловасці".

Сёння вялікі перагаворны дзень. Заўтра дэлегацыі правядуць пленарнае пасяджэнне, у якім прымуць удзел кіраўнікі парламентаў абедзвюх краін. Чакаецца, што па выніках форуму бакі падпішуць каля двух дзясяткаў пагадненняў. 

Дзелавой часткай падзея не абмяжуецца. Тут, у Белэкспа, будзе працаваць выстава. Узбекскія прадпрыемствы прэзентуюць больш за тысячу найменняў тавараў: гародніна і садавіна, арэхі, лекі, тэкстыль. Асобныя экспазіцыі будуць прысвечаныя дасягненням у ІТ-сферы і турызме. Экспартны патэнцыял пакажуць 10 рэгіёнаў азіяцкай рэспублікі.