Сёння дэпутаты Палаты прадстаўнікоў пачалі абмеркаванне цэнтральных артыкулаў даходаў і расходаў краіны ў будучым годзе. Як сцвярджаюць распрацоўшчыкі, бюджэт-2014 звярстаны бездэфіцытным. Усе сацыяльна значныя артыкулы будуць прафінансаваныя ў поўным аб'ёме. Стаўкі падатку на дабаўленую вартасць і падатку на прыбытак урад прапануе захаваць, раней абмяркоўвалася магчымасць іх змянення. Прапаноўваецца ўвесці дзяржпошліну за допуск аўтамабіляў да ўдзелу ў дарожным руху. Яна можа скласці ад 3 да 5 базавых велічынь за год.
Пакуль на руках у дэпутатаў нават не законапраект аб бюджэце (яго можа ўнесці толькі Кіраўнік дзяржавы), а пакет спадарожных яму дакументаў, прадстаўленых урадам. Пачынаючы так загадзя прапрацоўваць пытанне з парламентам, Саўмін страхуецца ад магчымых цяжкасцяў пры разглядзе праекта бюджэту ў Авальнай зале. Дыскусіі абяцаюць быць вострымі. Нагадаем, Кіраўнік дзяржавы даручыў дэпутатам сёлета асабліва крытычна паглядзець на бюджэт.
